LSI kërkon pamjet filmike të kamerave të qendrave të votimit

LSI kërkon pamjet filmike të kamerave të qendrave të votimit në rang vendi.

LSI i është drejtuar me një kërkesë Komisionit Qendror të Zgjedhjeve dhe kërkon kopjen e materialit filmik të 5199 pajisjeve në të gjithë vendin.

Gjatë deklaratës për shtyp Kryetarja e LSI Monika Kryemadhi u shpreh se procesi zgjedhor ishte i manipuluar, ndërsa ata do të vazhdojnë betejën deri në fund duke bërë të ditura faktet në ditën në vijim.

"I nderuar z.Komisioner,

Në përfundim të procesit zgjedhor për Zgjedhjet për Kuvendin e datës 25 prill 2021, si subjekt zgjedhor me interes të ligjshëm në këtë proces, kërkojmë nga ana juaj vënien në dispozicion të kopjeve të materialit vijues:

1. Kopje të pamjeve filmike ( video ) të kamerave të Qendrave të Votimit për 5199 QV në rang vendi

2. Kopje të materialit elektronik të 5199 pajisjeve PEI në rang vendi," shkruhet në letrën dërguar KQZ.