Denoncimi/ Datat e skadencës "zhduken" për 3 sekonda. Apeli për blerësit: Raportoni menjëherë produktet!

Ligjet dhe udhëzimet  për mbrojtjen e konsumatorit në Shqipëri nuk kane shumë ndryshim me ato të vendeve te Bashkimit Europian, por ndryshe  nga BE në vendin tonë  ligji shkruhet qartësisht por nuk zbatohet.

Shqetësimi i konsumatorëve adresuar në TV Ora News ne lidhje me produkte që data e skadencës i  fshihet lehtësisht ka bëre që TV Ora News t’i drejtohet me një kërkesë për informacion Kompanise ELKA.

Më konkretisht disa produkteve të kësaj kompanie data e skadencës i fshihet lehtësisht, çka është në kundërshtim me Vendimin Nr. 434 te vitit 2018 i cili saktëson se data skadencës nuk duhet të fshihet.

Në kthimin e përgjigjes nga ELKA na është bërë me dije se procesi i vulosjes së produkteve bëhet  në përputhje me ligjet në fuqi. Për të saktësuar  atë që thotë ligji i jemi drejtuar AKU me një kërkesë për informacion në lidhje me fshirjen e datës së skadencës.

Ky institucion na bën me dije se  bazuar ne Vendimin Nr. 434 për etiketimin e ushqimeve “Informacioni ushqimor i detyrueshëm duhet të jetë qartësisht i lexueshëm dhe të mos fshihet”.

Njëkohësisht AKU na bën me dije se në bashkëpunim me Krimin Ekonomin ka konstatuar 2 raste të produkteve, data e skadencës të së cilave fshihej dhe pasi i ka gjobitur subjektet, ka bërë bllokimin e mallit.

Ashtu sikurse AKU na ka informuar data e skadencës nuk duhet te fshihet ndërsa mjafton një test i thjesht për të parë se patatinave dhe kroasantëve nuk i fshihet asnjë e dhënë, përveç datës së  skadencës.

Sipas Drejtorit të Qendrës për Mbrojtjen e Konsumatorit të gjitha produktet etiketa e të cilave fshihet konsiderohen të pasigurta për blerësin

TV Ora News ka bëre blerje të disa produkteve  te ngjashme në një shtet të BE. Siç shihet qarte edhe nga pamjet është e pamundur për tu fshirë data e skadencës.

As produkte si alkooli, ose më të forta nuk mund ta heqin datën e skadencës të mallrave që tregtohen në BE, ndërsa në vendin tone ajo fshihet vetëm me një të kaluar të gishtit.

Fshirja e datave të skadencës mund t’i hapë rruge abuzimit. Sipas të dhënave zyrtare nga AKU, për manipulimin e datës së skadencës  dhe mangësive në etiketim nga viti 2021 deri në 2023 janë vendosur në total 262 gjoba.