Ceremoni spektakolare por pa tifozë. Olimpiada ngre siparin, parakalon ekipi olimpik shqiptar

Në një stadium gjigand dhe të boshatisur, me vetëm 950 të pranishëm, u mbajt ceremonia e hapjes së Lojërave Olimpike të Tokyos.

Perandori japonez, Naruhito, Zonja e Parë e Shba-ve, e shumë personalitete ishin të pranishëm në ceremoni teksa të parët kaluan delegacioni japonez dhe më pas me radhë ekipet olimpike.

Edhe ekipi kuqezi i Olimpiadës parakaloi teksa Shqipëria perfaqesohet me 9 sportistë, ndërsa Briken Calja dhe Luiza Gega valvitën flamurin kuqezi.

Eventi më i madh sportiv nuk mund të mos kujtonte vitin e vështirë nga pandemia dhe gjithçka nisi me një minutë heshtje në kujtim të mijëra viktimave nga covid-19.
Kryefjala e tê gjithë ceremonisë ishin masat kundër covid-19, aq sa edhe për të mos ekzaltuar frymën sportive të eventit në fjalën e Perandorit është hequr fjala festë, apo festive.

204 shtete të globit janë përfaqësuar nga 11.238 atletë pa llogaritur ata nga Koreja e Veriut dhe Guinea që janë tërhequr nga eventi për shkak të frikës nga koronavirusi.

Mesazhi i këtij eventi madhor është ai i rikthimit të jetës në normalitet dhe i shpirtit të garës dhe të sportit që nuk duhet të mungojë kurrë.
Për Shqipërinë, synimi madhor është ai i një medaljeje të parë historike në një Olimpiadë dhe janë 9 sportistë ndaj të cilëve të gjithe shqiptarët kanë kthyer sytë.

Briken Çalja e Luiza Gega janë ata që mund të synojnë medaljen por suprizën mund ta bëjë edhe Matvei Petrov ai i cili i dha edhe një medalje të parë botërore Shqipërisë.
Shpresat janë të mëdha, Olimpiada dhe spektakli sapo ka nisur..