6 VITE NGA TËRMETI TRAGJIK/ 51 persona ndërruan jetë nga lëkundjet e tokës më 26 nëntor 2019

Kjo e mërkurë shënoi 6 vite nga tërmeti tragjik i 26 nëntorit 2019, që la pas 51 viktima, mijëra të lënduar dhe dëme të pallogaritshme. 

Shqipëria kujton këtë të mërkurë 26 nëntorin 2019, ditën kur një tërmet me magnitudë 6.4 goditi vendin, duke shkaktuar një prej tragjedive më të mëdha të dekadave të fundit.

Pasojat e tij ishin shkatërruese: 51 jetë të humbura, mbi 900 të lënduar, mijëra banesa të shembura dhe rreth 17 mijë persona të zhvendosur. Qytetet më të goditura, Durrësi, Thumana dhe Tirana, mbajnë ende gjurmët e asaj dite.

6 vjet më vonë, procesi i rindërtimit shfaqet me dy realitete të ndryshme: nga njëra anë komplekse të reja banimi të projektuara dhe dorëzuara, nga ana tjetër familje që ende presin shtëpi të përhershme.

Sipas raportimeve të fundit të Bashkive dhe Zyrës së Rindërtimit, rreth 90% e projekteve kryesore janë finalizuar, por ka ende familje në proces transferimi, pritjeje apo verifikimi dokumentesh.

Ndërkohë, specialistët e fushës paralajmërojnë se Shqipëria mbetet tepër e ekspozuar ndaj rrezikut sizmik.

Raportet ndërkombëtare tregojnë se standardet e reja të ndërtimit janë më të forta, por ende ka ndërtime të vjetra që përbëjnë rrezik për popullatën, sidomos në zonat urbane të dendura.

Gjashtë vite pas tërmetit, kujtesa e asaj nate vijon të jetojë, bashkë me shpresën se mësimet e saj do të shërbejnë për një të ardhme më të sigurt.