VOLEJBOLL/ Pogradeci shkruan historinë, mund Tiranën dhe shpallet kampion në ndeshjen e pestë. Flasin PROTAGONISTËT

Pogradeci shkruan historinë në volejbollin shqiptar të femrave. Duke mundur 3 me 0 Tiranën në ndeshjen e pestë është shpallur kampion.

Pogradecaret e mbyllin shpejt setin e parë 25 me 16, por në setin e dytë tiranaset kërkojnë baraspeshën tek shkojnë në 8 me 13, por vetëm kaq, pasi pogradecaret e fitojnë edhe këtë set 25 me 20. Seti i tretë ka pak histori, pasi liqenoret fitojnë 25 me 16.

Me Bajraktaroviç në organizim, ekipi i trajnerit Besnik Lisha ka fituar qetësinë e duhur në një finale si kjo, ndërsa Jonson në pozicionin “4” kanë qenë “kurthi” i trajnerit ndaj Tiranës. Nga ana tjetër, skuadra kryeqytetase, pa Malaj në pozicionin “3”, nuk ka pasur forcën e duhur në goditje.

Kjo fitore ka bërë që një qytet i tërë të përjetojë emocione të forta, ndërsa një ekip i tërë ka “fluturuar” nga gëzimi i titullit kampion.

Atmosfera në Pogradec ka qenë elektrizuese, me tifozët që kanë festuar gjatë për këtë arritje historike të vajzave liqenore.

Ky sezon ka qenë i jashtëzakonshëm për Pogradecin, pasi më herët liqenoret kishin fituar edhe Ligën “Gjergj Kastrioti” dhe Kupën e Republikës, duke kompletuar kështu një tripletë të artë në volejbollin shqiptar.

DEKLARATAT E PROTAGONISTËVE

Bajraktareviç: “Mundohem t’i jap ekipit energji të mirë dhe të mbajmë ritmin lart. Ndihem e mrekulluar është hera ime e parë që fitoj në një ligë. E pabesueshme, do festojmë shumë sot”.

Johnson: “Kur u nisa për të ardhur në Shqipëri nuk e prisja kurrë këtë, por u bekova me një grup fantastik vajzash dhe e bëmë gjithçka për njëra tjetrën. Kemi punuar shumë fort për këtë, këtë donim. Edhe Tirana punoi shumë fort, por në fund është vetëm një ekip që ngjitet të majë”.

Kapitenia Paola Gjata: “Po, ia dolëm! Tani mund të them me plot gojë që ja dolëm. E dija që nuk do ta falnim, me gjithë këtë mbështetje të qytetarëve tanë. Jemi shumë të lumtur që emri i Pogradecit do të shënohet në listën e ekipeve kampionë. Kishim tifozëri të mahnitshme, nuk kishte vende aq shumë janë. Kjo është nata e pogradecarëve dhe do festojmë”.

Besnik Lisha: “Absolutisht jemi përgatitur për ta fituar. Ka fituar ekipi më i mirë. Nuk ka ndodhur ndonjëherë që ekipet mike të fitojnë në fushën e kundërshtarit siç ka ndodhur me finalet por ka gjëra të mira dhe kjo pjesë dhe ekipet po luajnë njësoj në çdo fushë. Ky ekip, Pogradeci është ndërtuar të jetë fitues”.