VIDEO/ “Kam 5 Champions League”, Cristiano Ronaldo u përgjigjet tifozëve të Al Ahli-t

Në një tjetër mbrëmje protagoniste për Cristiano Ronaldo, sulmuesi portugez jo vetëm që udhëhoqi ekipin drejt fitores, por edhe dha një përgjigje që bëri jehonë jashtë fushës.

Al Nassr triumfoi 2-0 ndaj Al Ahli, duke konsoliduar vendin e parë në Saudi Pro League, me një diferencë të konsiderueshme nga ndjekësit.

Goli vendimtar erdhi pas një goditjeje këndi të ekzekutuar mjeshtërisht nga João Félix, të cilën Ronaldo e finalizoi me kokë, duke çuar shifrën personale në 970 gola në karrierë.

Ndërsa sfida në fushë u mbyll pa shumë histori, tensioni u zhvendos në tribunë. Tifozët e Al Ahli-t tentuan të provokonin yllin portugez, duke e ngacmuar për mungesën e trofeve në kompeticionet aziatike me klubin saudit.

Por përgjigjja e Ronaldos ishte e drejtpërdrejtë dhe e prerë: “Kam 5 Champions League. Pesë. Pesë”, deklaroi ai me një buzëqeshje, duke iu referuar suksesit të tij në UEFA Champions League.

Sulmuesi 41-vjeçar ka fituar trofeun më prestigjioz të klubeve në Europë pesë herë,  katër me Real Madrid dhe një me Manchester United,  një rekord që e vendos atë ndër më të mëdhenjtë në histori.

Pavarësisht moshës, Ronaldo vazhdon të jetë vendimtar dhe ambicioz. Objektivi i tij mbetet i qartë: të arrijë kuotën e 1000 golave në karrierë, ndërsa paralelisht synon të udhëheqë Portugalinë në sfidat e ardhshme ndërkombëtare.