Milani përgatitet t’i thotë lamtumirë Theos, Atletico Madrid presion të fortë

Milani po përgatitet të ndahet me Theo Hernandez, ndërsa Atletico Madrid po shton presionin për të siguruar shërbimet e mbrojtësit francez.

Klubi spanjoll, që është zgjedhja e parë e lojtarit pas refuzimit të ofertave luksoze nga Arabia Saudite, ka rritur ofertën ndaj kuqezinjve dhe kjo rritje mund të jetë vendimtare për fatin e transferimit.

Sipas raportimeve të gazetarit Gianluca Di Marzio, pas refuzimit të ofertës fillestare prej 15 milionë eurosh, skuadra e Simeones ka shtuar edhe 5 milionë të tjera, duke e afruar marrëveshjen mes palëve.

Por nuk është vetëm çështja e largimeve, pasi Milani po lëviz edhe për të gjetur zëvendësuesin e Theos.

Një përfaqësues i kuqezinjve është takuar gjatë ditës me drejtuesit e Arsenalit në Londër.

Në fokus është Oleksandr Zinchenko, mbrojtës ukrainas i lindur në vitin 1996, i cili ka kontratë me ‘Gunners’ deri në vitin 2026.

Milani mund ta sjellë atë për një shumë prej 15 deri në 18 milionë eurosh, ndërsa Zinchenko fiton rreth 5 milionë euro neto në vit.

Ky transferim duket i mundshëm, pasi Arsenal ka nisur të forcojë repartin e mbrojtjes me blerjen e të riut Hato nga Ajax-i.

Alternativat e tjera për Milanin në këtë pozicion janë Udogie, Cambiaso dhe De Cuyper.