Interi pa Dumfries, holandezi humbet sfidën ndaj Atleticos dhe rrezikon mungesë më të gjatë se parashikuar

Interi e ka ndier fort mungesën e Denzel Dumfries në derbi, ku skuadrës i ka munguar shtytja e tij karakteristike në krahun e djathtë.

Vetëm pas hyrjes në lojë të Diouf-it, zikaltërit kanë treguar pak më shumë gjallëri, ndërsa Carlos Augusto, i zgjedhur për ta zëvendësuar, ka pasur vështirësi në një pozicion që nuk është i natyrshëm për të.

Trajneri Cristian Chivu rrezikon tani të mbetet pa mbrojtësin holandez për një periudhë më të gjatë nga sa ishte parashikuar fillimisht.

Dumfries, i cili ka humbur edhe dy ndeshjet e kombëtares së Holandës ndaj Polonisë dhe Lituanisë për shkak të një dëmtimi në kyçin e këmbës të pësuar në sfidën e ‘San Siros’ kundër Lazios pas një kontakti me Zaccagni-n, dukej se do të tentonte rikuperimin për ndeshjen e së mërkurës në Champions League në Madrid kundër Atletico Madridit të Cholo Simeones.

Por situata ka ndryshuar: jo vetëm që ai nuk do të jetë i gatshëm për transfertën madrilene, por nuk do të udhëtojë as të dielën, më 30 nëntor, në Pisa.

Stafi mjekësor zikaltër do të rivlerësojë gjendjen e tij gjatë javës, por ekziston frika se Dumfries mund të mungojë edhe në sfidën e Kupës së Italisë më 3 dhjetor dhe në ndeshjen pasuese të kampionatit kundër Comos në ‘San Siro’, më 6 dhjetor.

Interi shpreson ta ketë gati më 9 dhjetor për ndeshjen e Kupës kundër Liverpool-it, por për momentin bëhet fjalë për një ndalesë që mund të shtrihet në katër ndeshjet e ardhshme.