Interi në garë për Jonathan David, një mundësi e artë, por me pengesa financiare

Të gjithë e duan, por askush deri tani nuk ka arritur të bëjë lëvizjen vendimtare për të mbyllur marrëveshjen.

Saga e Jonathan David vazhdon, pa një fund të afërt në horizont.

Megjithatë, diçka mund të jetë duke u zhbllokuar: sipas disa zërave nga Anglia, Interi është në krye të garës për sulmuesin kanadez, madje ka vendosur një ofertë konkrete në tavolinë.

Një objektiv i nxehtë për merkaton

Sulmuesi i Lille është një nga emrat më të kërkuar të merkatos së ardhshme.

Me 25 gola dhe 11 asistime këtë sezon në të gjitha kompeticionet, por mbi të gjitha me kontratën që i skadon në qershor, David është kthyer në një objektiv për shumë klube të mëdha europiane: Liverpooli, Arsenali, West Hami, Newcastle dhe Marseille janë në ndjekje.

Interi, që pritet të humbasë dy sulmues (Correa dhe Arnautovic), po planifikon të rindërtojë repartin ofensiv rreth Thuram dhe Lautaro Martinez. Një goditje si Jonathan David, me parametër zero, do të ishte një mundësi që nuk duhet shpërdoruar.

Sipas portalit ‘TeamTalk’, Interi ka intensifikuar kontaktet me përfaqësuesit e lojtarit dhe është në pozicionin më të avancuar për ta bindur.

Klubi zikaltër ka ofruar një kontratë pesëvjeçare me një pagë prej 4.5 milionë eurosh në vit, që me bonuset mund të arrijë deri në 6 milionë.

Megjithatë, rruga drejt kanadezit nuk është e lehtë. Shumë klube janë tërhequr për shkak të kërkesave shumë të larta të lojtarit dhe agjentëve të tij.

Sipas një dokumenti të zbuluar nga ‘Sky Sport Ch’, David kërkon një pagë bruto prej 9 milionë eurosh në vit (rreth 5 milionë neto sipas sistemit fiskal italian), plus 15 milionë në formë bonusi për firmën dhe 10 milionë të tjera për komisione.

Në total, një operacion që mund të arrijë në 70 milionë euro — një shifër që ka frikësuar shumë ekipe.

Pikërisht për këtë, Interi beson se ka një avantazh real: alternativat që ka David nuk janë në nivelin sportiv dhe kompetitiv të zikaltërve. Tani topi është në fushën e lojtarit.