Ngaterrojnë Budapestin me Bukureshtin, 6 francezë humbën sfidën Hungari-Francë

Ndodh edhe kështu, mund të bësh mijëra kilometra për të ndjekur kombëtaren tënde dhe në fund gabon qytetin ku duhej të ishe.

Kjo është historia e veçantë që u ka ndodhur 6 tifozëve francezë të cilët në vend që të niseshin për në Budapest për të ndjekur ndeshjen Hungari-Francë në “Puskas Arena”, zbarkuan në Bukuresht të Rumanisë.

Ngatërrimi i kryeqyteteve ishte me pasoja per ta pasi shkoi dëm i gjithë udhëtimi por historia sipas një gazetari rumun nuk mbaron këtu.

Francezët me të zbarkuar në Bukuresht panë shumë tifozë ukrainas dhe u ulën të pinin birra me ta dhe vetëm pas një bisede të gjatë mësuan gabimin trashanik dhe kuptuan që në Bukuresht do të luhej sfida tjetër Ukrainë-Austri.

Me të kontrolluar biletat, tifozët francezë kuptuan se kishin prenotuar gabimisht në Bukuresht por ata kanë një mundësi të artë pas gafës që bënë.

Franca nëse del e para në Grupin F sonte, do të luajë pikërisht në “National Arena” të Bukureshtit ndeshjen e saj të 1/8 të Europianit ndaj dhe tifozët që gabuan herën e parë, kanë fatin që ta shikojnë pikërisht në Bukuresht ekipin e tyre por vetëm duhet të luten e të bëjnë tifozllik që skuadra e Deschamps ta mbyllë si e para Grupin F.