FIFA, të enjten Infantino në Tiranë, takime zyrtare me Ramën dhe Dukën

Zhurma që po lë pas Kombëtarja Shqiptare në opinionin publik është e destinuar të venitet, të paktën për veshët e FSHF-së që përgatitet të presë presidentin e FIFA-s, Gianni Infantino. Zërat ishin në qarkullim prej ditësh por tashmë është zyrtare që njeriu më i fuqishëm i futbollit botëror do të zbarkojë në Tiranë të enjten e 29 shtatorit ku do të takohet fillimisht me Kryeministrin, Edi Rama dhe më pas me drejtuesit e futbollit shqiptar në “Shtëpinë e Futbollit” ku do të inagurojë punimet e bëra falë mbështetjes financiare të FIFA-s që përfshijnë edhe dy fushat stërvitore të ekipeve kombëtare.

Komunikata zyrtare e FSHF:

"Presidenti i FIFA-s, Gianni Infantino do të vijë për një vizitë zyrtare në Shqipëri më datë 29 shtator për t’u takuar me drejtuesit e FSHF-së dhe anëtarët e komunitetit të futbollit shqiptar. Një vizitë që përkon me festimet për 90-vjetorin e anëtarësimit të FSHF-së në FIFA, por edhe për inaugurimin e “Shtëpisë së Futbollit”, një kompleks modern i financuar pikërisht nga programi “Forward” i FIFA-s.

Gjatë vizitës, Presidenti Infantino do të pritet në një takim edhe nga Kryeministri i Shqipërisë, Edi Rama, ndërkohë që do të marrë pjesë në eventin festiv që do të organizohet në “Shtëpinë e Futbollit” me rastin e inaugurimit.

Ky kompleks gjigand, në të cilin ndodhet edhe selia e FSHF-së, është thuajse drejt përfundimit së bashku me dy mini-stadiumet, që shumë shpejt do të hapin dyert për ekipet kombëtare të Shqipërisë e ofrojnë një infrastrukturë bashkëkohore me të gjitha kushtet që kanë stadiumet më moderne. Një investim madhor i FIFA-s e që i jep ekipeve kombëtare të moshave një shtëpi dinjitoze ku talentet e reja kanë të gjitha ambientet e nevojshme.

Numri një i FIFA-s e kishte paralajmëruar prej muajsh këtë vizitë përmes një letre dërguar presidentit të Federatës Shqiptare të Futbollit, Armand Duka, ku shprehte kënaqësinë për të ndarë vizionin e përbashkët për futbollin dhe mënyrat për të zhvilluar më tej lojën tonë dhe promovimin e vlerave të saj në Shqipëri dhe në rajon.

Infantino e ka vlerësuar vazhdimisht punën e mirë të bërë nga Presidenti Duka dhe FSHF gjatë gjithë këtyre viteve në mbështetje të zhvillimit të futbollit dhe ka mbështetur qeverinë e futbollit shqiptar në çdo hap e projekt".