De Rosssi sfidon Interin: Çdo skuadër është e thyeshme, mjafton të besosh!

Daniele De Rossi këtë fundjavë ka provën e parë të vërtetë në krye të Romës. Skuadra verdhekuqe do të presë kryesuesit e Interit, ndërkohë që strategu i ri dhe pse me pak përvojë është i bindur se mund t’i hapë telashe zikaltërve.

“Po përgatitemi me shumë kurajë dhe me moralin lart për ndeshjen ndaj Interit. Çdo skuadër në botë mund të mposhtet dhe Inter nuk bën përjashtim.

E dimë që ata janë më të fortët në këtë kampionat, por e dimë që ka disa aspekte në të cilat mund t’i bezdisim. Ne jemi të vetëdijshëm se jemi një skuadër e fortë dhe që mund ta mposhtim Interin.

Nëse ke shumë respekt për kundërshtarin atëherë do të thotë që ke frikë dhe kështu i humbet ndeshjet. Interi me të vërtetë është i fortë, por në një ndeshje teke mund të ndodhë gjithçka.

Roma nuk ka probleme me mentalitetin sepse në organikë ka lojtarë që kanë fituar shumë, kanë fituar Botërorë, Europianë. Nëse themi kështu atëherë i ofendojmë ata.

Lukaku? Dua që të bëjë të njëjtën ndeshje si me Cagliarin. Më pëlqeu shumë sepse luajti për skuadrën. Ndonjëherë kur luan kundër ish-skuadrës ndodh që bën ndeshjen e jetës, por ndonjëherë edhe bën ndeshjen më të dobët”, u shpreh De Rossi.