Mali i Zi: 1400 kg kokainë në magazinat e biznesmenit. Në 2001 i rrëmbyen vëllanë e kërkuan shpërblim 3.5 mln marka gjermane

Prokuroria malazeze ka deklaruar se pesha totale e kokainës së gjetur në ngarkesën me banana dy ditë më parë është 1400 kilogramë.

Sipas policisë vendase, kapja e kësaj ngarkese u ka hequr nga duart trafikantëve një pasuri me vlerë të paktën 100 milionë euro.

Kontejneri me banana mbërriti me anijen MSC Charlotte në portin e Barit më 24 gusht, tre orë pas mesnate, ndërkohë që më parë kishte ndalur në portin e Koperit.

Anija MSC Charlotte e cila lundroi drejt Tivarit me flamurin e Liberisë zakonisht merr kontejnerë nga destinacione të largëta si porti i Gioia Tauro dhe i transporton ato nëpër detet Adriatik dhe Egje.

Autoritetet malazeze kishin informacion nga partnerët e huaj për praninë e kokainës mes bananeve, por lejuan kalimin e saj në port me qëllim ndjekjen e ngarkesës deri në destinacionin final.

Kamioni në të cilin ishin vendosur bananet shkoi në fshatin Zeta ku mbrëmjen e 26 gushtit, 66-vjeçari Budimir Krstović dhe vajza e tij Marina 27 vjeçe u arrestuan në depon e tyre pasi bananet dhe kokaina ishin shkarkuar aty. Dy të arrestuarit mohuan përfshirjen në kontrabandën e kokainës në polici.  

Gazeta malazeze "Vijesti" publikoi pamjet e skanerit në portin ku kaloi ngarkesa me banana, ku ishte evidentuar prania e kokainës në pajisjen frigoriferike me targa regjistrimi PG-353GA.

Një zëdhënëse e Prokurorisë komnfirmoi se në këtë aksion ishin sekuestruar 1,400 kilogramë kokainë.

Sipas të dhënave nga hetimi, kontrabandistët e drogës fitojnë në treg rreth 30 mijë për një kilogram kokainë, por në varësi të pastërtisë çmimi i saj mund të arrijë deri në 100 mijë euro për kilogram.

Policia malazeze në bashkëpunim me partnerët ndërkombëtarë, po hetojnë për të zbardhur vendin ku ishte ngarkuar kokaina dhe kush ishin pritësit e saj.

Kompania e Budimir Krstović, në magazinën e të cilit u sekuestrua droga, ka pasur aktivitet në biznesin e importimit të frutave për disa dekada, megjithatë ka shpallur falimentin në vitin 2019.

Në 2001 vëllai i biznesmenit të arrestuar u rrëmbye pranë një hoteli në Novi Sad dhe rrëmbyesit kërkuan një shpërblim prej 3.5 milion markash gjermane në atë kohë.

Rrëmbyesit u arrestuan dhe pengu u lirua katër ditë më vonë.

Zëvendëskryeministri dhe koordinatori i shërbimeve të sigurisë, Dritan Abazovic, përgëzoi policinë dhe punonjësit e doganës për kapjen historike të kokainës, duke thënë se Mali i Zi nuk do të jetë një vend krimi.