“Presidenti, fushatë për PS-në”, Hysaj: Kur Baromi zgjohet dhe e gjen veten duke bërë fushatë për padronin e tij D'rama

Sekretarja për Marrëdhëniet me Publikun në Partinë Demokratike, Jola Hysaj përmes një postimi në rrjetet sociale akuzon Presidentin e Republikës Bajram Begaj se ka nisur një fushatë në favor të qeverisë në gjithë vendin.

“Kur Baromi zgjohet e gjen veten duke bërë fushat për D'Ramën!

Nuk është hera e parë në të cilën shkelet Kushtetuta haptazi, nuk është hera e parë në të cilën administrata bën fushatë për KM, por a është e ligjshme që Ambasadorët dhe Presidenti  i Republikës ta bëjë këtë?

Dëshpërimi për votën e diasporës është i madh apo jo KM? Por a e menduat mirë kur i çuat shqiptarët në një dëshpërim aq të madh sa të gjenin si të vetmen rrugë ikjen nga Shqipëria?

Ah po tani shkon e lëpihesh për të marrë votat, e ata që teorikisht duhet të sigurojnë mbarëvajtjen  dhe sigurinë  e  zgjedhjeve dalin e bëjnë fushatë haptazi kundra ligjit për lartmadhninë?

Sa për Baromin kam veç një pyetje, pasi i more fytyrën gjithë Shqiptarisë duke iu lëpirë Erdoganit se nuk të dilnin 600m² Presidencë, të cilës ti as historikun me siguri nuk ia di, tani si "rregullator i paanshëm" me çfarë fytyre bën fushatë për padronin tënd D'rama? Apo e ke kusht nga punëdhënësi yt dhe ti të gjesh përveç farefisit dhe ca vota në diasporë se ndryshe humb vendin e punës?”, shprehet Jola Hysaj.

Kjo cështje ishte edhe në qendër të debateve në seancën plenare ku u referuan vizitat e presidentit Bajram Begaj, në të cilët ai po shfaqet si zyrtar i pushtetit socialist.

Fillimisht ishte deputeti Saimir Korreshi që e akuzoi se po merret me fushatën zgjedhore.

“Si kryetare Kuvendi pse nuk e mblodhe byronë, e ke detyrim, jo t’i lësh të rrjedhin si shoku President, që vjen e bën fushatë në Lushnjë si me qenë kryetar bashkie, vjen me def e kitarë,” tha Korreshi.

Më pas ishte kreu i grupit parlamentar të PD, Gazment Bardhi që hodhi akuza të rënda ndaj Begajt.

“Presidenti i Republikës nuk gëzon asnjë respekt nga opozita sa kohë sillet si ushtar i rëndomtë i Edi Ramës.

Presidenti që qëndrojë larg fushatës zgjedhore dhe të mos shitet për dy leje ndërtimi për dy vila për djemtë e tij,” tha Bardhi.