I doli emri në dosjen e SPAK për Ahmetajn, PS publikon faturat e udhëtimeve të Gjiknurit

Sekretari i Përgjithshëm, Damian Gjiknuri ka folur në një prononcim për media për përfshirjen e tij në dosjen e SPAK për ish-zv.kryeministrin Arben Ahmetaj.

Gjiknuri deklaroi se nuk kishte bërë udhëtime qejfi ndërsa me Ahmetajn ka udhëtuar për shkak të detyrës si ministër.

Ndërkohë PS ka publikuar disa nga faturat e udhëtimeve të Gjiknurit.

"Shkurt se e di që keni kuriozitet publik! Unë qëndrimet e mia i kam bërë publike dhe në komisionin hetimor; nuk ka ndodhur asgjë e re që nga ajo kohë, përveçse se rast pas rasti, gjithkush do të përdorë përmendjen e emrit tim për të ngritur kauza politike.

Të them të drejtën dhe po e them dhe këtu siç e kam thënë edhe në komisionin hetimor, të gjitha ato udhëtime, në fakt dy, se vetëm dy që kanë dalë në media, të pretenduara, janë udhëtime zyrtare. Ka dokumentacion përkatës në Ministrinë e Infrastrukturës. Jam në dijeni që mbase dhe Prokuroria i zotëron, edhe unë personalisht i zotëroj.

Nuk kam pse të bëj debat publik të nxjerr letra. Udhëtimet e mia si ministër janë të deklaruara, janë udhëtime zyrtare dhe nuk kam vajtur as për qejf dhe “as kam bredhur me njerëz”, të cilët ju mund të pretendoni për lidhje të caktuara.

Për sa i përket rolit tim si ministër. Roli im si ministër nuk ka asnjë shkelje ligjore në asnjë procedurë.

E para njëherë, i kam shpjeguar dhe në komisionin hetimor rolin që ka pasur ministri i Infrastrukturës dhe Energjisë. Nuk ka dalë dikush të citojë një shkelje ligji nga unë si ministër në ushtrimin e detyrës time. Firmosja e një akti të qeverisë, pavarësisht nga pretendimet apo hamendësitë që mund të ketë në lidhje me këto procedura, nuk përbën as vepër penale, as shpërdorim detyre, sepse çdo ministër përgjigjet për atributin e zyrës që përfaqëson dhe nuk është qeveria organizatë kriminale. Përkundrazi, qeveria është një institucion i organizuar ku secili ministër, shpreh mendimin e tij dhe ushtron funksionin sipas detyrës që ka.

Pra këto janë ato që dua të them. Dua të shtojë në fund fare, mos e bëni hetimin penal apo akuzat sipur po hetojmë “pacientin zero”, ky njeh këtë, ka takuar këtë dhe secili paska marrë virusin. Bëhet fjalë për akte zyrtare dhe pasoja konkrete. Kështu që lidhjet rastësore me persona apo njohjet, nuk kanë asnjë lloj vlere për pretendimet, të cilat ngritët ju.

Pyetje: A keni bërë udhëtime me Mirel Mërtirin dhe Arben Ahmetajn?

Përgjigje: Atëherë, ua thashë. Me Arben Ahmetajn kam bërë udhëtime, sepse ka qenë ministër, ka qenë koleg, dhe të dy udhëtimet e cituara konsultojini, drejtohuni dhe ju si gazetarë po të doni Ministrisë së Energjitikës, merrni infromacionin zyrtar, a ka urdhër shërbimi dhe a ka dokumentacion shoqërues.

Pyetje: Z. Gjiknuri, në dosjen e SPAK thuhet se Klodian Zoto ju ka paguar fjetjen në Vienë dhe Frankfurt pse duhet t’ua paguante ju z. Zoto një udhëtim zyrtar?

Përgjigje: Mos bëni auto-sugjestionim. Ua thashë, i keni faturat atje, keni gjithçka atje.

Ju them një gjë, në detyrën time kam zbatuar ligjin. Akuza politike dhe akuzat “quasi” penale ka vite që ngrihen ndaj meje. Ua kam sqaruar në Komisionin Hetimor edhe në lidhje me njohjet dhe të njohësh njerëz nuk është krim.

Faleminderit!"