Tare mohon nënshkrimin me Mavraj por pista mbetet e hapur
Nga OraNews Përditësimi i fundit 11 Qershor 2013, 11:19
Edhe pse flitej për kalimin e një tjetër shqiptari në radhët e skuadrës së Lacios në Itali, drejtori sportiv i Bardhekaltërve, Igli Tare, ka sqaruar gjithëçka rreth zërave të fundit.
Ish sulmuesi i kombëtares sonë në një intervistë për mediat Italiane ka mbyllur përkohësisht rrugën transferimit të Mergim Mavrajt te Lacio për sezonin e ardhshëm, duke bërë të qartë se pavarësisht interesimit, nuk kishte ekzistuar asgjë konkrete për mbrojtësin e përfaqësueses shqiptare. Duke folur për një nga mediat e kryeqytetit italian, Tare ka shpjeguar mendimet e tij mbi merkaton e klubit dhe atë që pritet të ndodhë gjatë verës.
"Do të afrojmë në skuadër 4-5 lojtarë, po punojmë për këtë çështje dhe kur të jetë momenti i duhur, do të tregojmë gjithëçka. I pyetur rreth Mavrajt, Tare është përgjigjur: “Ai është një lojtar fantastik por ne nuk kemi kontaktuar kurrë me të. 99% e asaj që dëgjoj nuk është e vërtetë", deklaroi Tare për mbrojtësin shqiptar që aktivizohet te Grojter Fyrth.
Por kjo deklaratë nuk ka mbyllur përfundimisht çështjen e transferimit të Mavrajt pasi vetë fjalët e Tares nuk kanë përjashtuar kategorikisht blerjen e mbrojtësit shqiptar. Duke parë se Grojter Furth e deklaroi të pashitshëm mbrojtësin për të synuar rritjen e çmimit, tashmë edhe Lacio pretendon se nuk ka më interes te ai, në mënyrë që t'i kundërpërgjigjet kësaj lëvizje të klubit gjerman.
Mediat italiane bëjnë të ditur se nëse situata kthehet ajo e një jave më parë, me klubin gjerman që pranon një ofertë prej 2.5 milion eurosh, atëherë transferimi i lojtarit do të realizohet, pasi Petkoviç ka dhënë miratimin e tij për këtë lëvizje.Çështja Mavraj nuk duket një kapitull i mbyllur për Kryeqytetasit të cilët për ti ulur disi çmimin kanë mohuar kontaktet me lojtarin.
