Miami mund San Antonin dhe rikthen barazimin në serinë e rezultateve
Nga OraNews Përditësimi i fundit 10 Qershor 2013, 11:36
Majemi ka arritur më në fund të tregojë edhe ndaj San Antonios llojin e basketbollit që e bëri atë skuadrën më të mirë në NBA në këtë sezon, duke i siguruar 66 fitore.
Kampionët në fuqi të NBA-së kanë triumfuar me rezultatin 103-84, pas një periode të tretë dhe të katërt ku kanë dominuar plotësisht për të mbyllur këtë ndeshje.
Deri në fundin e periodës së tretë, ndeshja ishte shumë e luftuar dhe për më tepër, Majemi e pa veten shpesh të ndiqte San Antonion. Por pastaj, një rezultat i pjesshëm 33-5, shkatërroi plotësisht teksanët dhe i dha Majemit këtë fitore shumë të rëndësishme, që barazon serinë finale të NBA-së para se ajo të zhvendoset në fushën e San Antonios.
Këtë radhë, LeBron Xhejms, ndau detyrat me shokët e skuadrës, pasi ylli i Majemit shënoi 17 pikë, 8 topa në tabelë e 7 pasime, një paraqitje poshtë standardeve po të shohësh mesataret e tij sezonale. Por në fakt ai punoi më shumë për t'i krijuar hapësira shokëve, sidomos në gjuajtjet nga distanca, me Miller e Alen që realizuan nga 3 të tilla.
Në radhët e San Antonios, lojtari më i dalluar në këtë ndeshje ishte Deni Grin, që shënoi 17 pikë, falë 5 gjuajtjeve të sakta për 3 pikë.
Pas barazimit të serisë së fitoreve, në radhët e skuadrës së Majemit është rikthyer entuziazmi ndërsa pritet që në ndeshjet e ardhëshme ata të tregojnë sërish forcën e kampionëve në fuqi të NBA-së.
