Nga qetësues dhimbjesh në mbrojtje kundër kancerit/ Çfarë po zbulojnë shkencëtarët për aspirinën

Aspirina, një nga ilaçet më të përdorura për dhimbje dhe temperaturë, po shihet gjithnjë e më shumë edhe si një mundësi për parandalimin e disa llojeve të kancerit, sidomos atij të zorrës së trashë.

Studime të fundit tregojnë se përdorimi i rregullt i saj mund të ulë rrezikun e zhvillimit dhe përhapjes së sëmundjes.

Në veçanti, te personat me Sindromën Lynch, një gjendje gjenetike me rrezik të lartë për kancer, është vënë re një ulje e ndjeshme e rasteve te ata që kanë marrë aspirinë për një periudhë të gjatë.

Edhe te pacientët që kanë kaluar më parë kancer, disa kërkime tregojnë se aspirina mund të ndihmojë në uljen e rrezikut të rikthimit të sëmundjes.

Shkencëtarët mendojnë se efekti lidhet me uljen e inflamacionit në trup, ndikimin në rritjen e qelizave dhe mënyrën se si përhapet kanceri në organizëm. Po ashtu, mund të ketë rol edhe në forcimin e reagimit të sistemit imunitar.

Megjithatë, mjekët paralajmërojnë se aspirina nuk është e përshtatshme për të gjithë. Përdorimi i saj për një kohë të gjatë mund të shkaktojë efekte anësore si gjakderdhje ose probleme me stomakun, ndaj duhet marrë vetëm me këshillë mjekësore.