“Mos u hidhni menjëherë në krevat”/ Punonjësja e hotelit zbulon kontrollin që duhet të bëni sapo hyni në dhomë

Një ish-punonjëse hoteli ka ngritur alarmin për pastërtinë dhe higjienën në dhomat e hoteleve, duke paralajmëruar udhëtarët që të mos hidhen menjëherë në krevat sapo futen në dhomë.

Sipas saj, shumë persona nuk e dinë se kontrollet për insektet e shtratit bëhen shumë rrallë dhe rreziku për të hasur probleme është më i madh nga sa mendohet.

Natalie Brookson, e cila ka punuar prej vitesh në industrinë e hotelerisë, tregoi se në hotelin ku ka qenë e punësuar, kontrollet për insektet e shtratit kryheshin vetëm në një numër shumë të vogël dhomash.

Ajo këshillon që para se të përdoret krevati, të kontrollohen me kujdes qepjet e dyshekut, pjesët anësore dhe çarçafët për njolla të vogla gjaku apo shenja të tjera që mund të tregojnë praninë e insekteve.

Sipas saj, një tjetër detaj që nuk duhet neglizhuar janë jastëkët dekorativë dhe mbulesat e krevatit, pasi shpesh ato nuk lahen aq rregullisht sa mendojnë mysafirët.

Ajo rekomandon gjithashtu që gotat e lëna në dhomë të shpëlahen para përdorimit dhe valixhet të mos vendosen mbi krevat.

Ekspertët paralajmërojnë se insektet e shtratit përhapen shumë shpejt dhe mund të mbijetojnë për muaj të tërë pa ushqim. Nëse transportohen pa dashje në shtëpi përmes rrobave apo valixheve, ato mund të krijojnë një infektim serioz brenda pak javësh.

Për këtë arsye, këshillohet që pas kthimit nga udhëtimi, rrobat të lahen menjëherë në temperaturë të lartë dhe valixhet të kontrollohen me kujdes, në mënyrë që të shmangen problemet që këto insekte mund të shkaktojnë në shtëpi.