"I drejti i kombeve", përkujtohet 100 vjetori i vizitës së politikanit francez Justin Godar në Shqipëri

Kur politikani francez, Justin Godart, mbërriti në Shqipëri pas konferencës së paqes në 1919, fuqitë e mëdha dhe fqinjët ende kishin plane për copëtimin e Shqipërisë.

Pas vizitës ai i tregoi botës se këto pretendime ishin të padrejta ndaj Shqipërisë.

Në kujtim të tij, historiani Pëllumb Xhufi mes rreshtave të ditarit të Godartit paraqet të dy anët e medaljes që ai njohu për Shqipërinë dhe shqiptarët.

Nga Shkodra, mbresa i kishte lënë bashkëjetesa fetare që prej vitit 1921.

"Në Shkodër ai gjen një vlerësim të gruas shqiptare."

Duke vlerësuar historinë e Shqipërisë, Godart i dukej e pafalshme që vendasit nuk e njihnin si duhej.

"Kur ishte në Berat ishte mahnitur nga kështjella e Beratit, pasuritë, nga kishat e Beratit dhe kur fioli me një vrionas që e shoqëronte ai iu mburr se kishte qenë një herë në kështjellën e Beratit megjithëse sarajet i kishte 200 metra poshtë kështjellës."

Dorjan Koci, drejtori i Muzeut Historik sjell në vëmendje atë se çfarë Godart shkruan për jugun, i cili pretendohej të merrej nga Greqia.

"Godart nuk heziton të mbajë qëndrim kur përshkruan shkatërrimet e fshatrave myslimanë të krahinës nga forcat greke në vitin 1914. Pirgje me rrënoja, mure të rrëzuara, shkruan Godart, duke dokumentuar edhe njëherë në opinionin publik botëror masakrat greke në Shqipërinë e jugut."

Në kuadër të 100 vjetorit të kësaj vizite, dy institucionet, Muzeu Historik Kombëtar dhe Akademia e Shkencave firmosën një marrëdhënie bashkëpunimi, ku në fokus do të jetë edhe hartimi i historisë.

Justin Godart njihet ndryshe edhe si ‘i drejti i kombeve”. Ai e përkrahu çështjen e popujve të Ballkanit e në mënyrë të veçantë të Shqipërisë, duke u bërë një mbrojtje e shkëlqyer për arenën ndërkombëtare.

Godart për të gjithë ndikimin pozitiv në arenën ndërkombëtare dhe atë se cçarë i ka lënë Shqipërisë është dekoruar me urdhrin e Skënderbeut.