Rritje e lehtë e kostove të prodhimit në 3-mujorin e dytë

Në tremujorin e dytë të vitit 2025, kostoja në prodhim u rrit me 0,3% krahasuar me të njëjtën periudhë të vitit të kaluar.

Referuar raportit të publikuar sot nga Instituti i Statistikave (INSTAT), seksionet që kontribuuan më shumë në këtë rritje ishin “furnizimi me ujë, aktivitete të trajtimit dhe menaxhimit të mbeturinave” dhe “industria përpunuese”, secila me rritje prej 0,4%. Ndërkohë, seksioni “industri nxjerrëse” pati një rritje më të ulët prej 0,2%.

Për sa i përket aktiviteteve të veçanta, sektori i “prodhimit të mobiljeve” ka pësuar një rritje të konsiderueshme të çmimeve prej 2,5%, ndërsa “prodhimi i kimikateve dhe produkteve kimike” ka shënuar një rënie të çmimeve me 1,6%.

Kur krahasojmë çmimet për tregun vendas, ato kanë pësuar një rritje prej 0,5% krahasuar me vitin e kaluar, ndërsa për eksport, kjo rritje ka qenë gjithashtu 0,5%.
Pjesa më e madhe e rritjes për eksport vjen nga sektori i industrisë nxjerrëse, me një rritje prej 2,7%.

Në krahasim me tremujorin e parë të vitit 2025, çmimet e prodhimit janë rritur lehtësisht me 0,1%. Kjo rritje është më e dukshme në industrinë nxjerrëse dhe atë përpunuese.