Balluku në Ministerialin e COP 28 në Dubai: Eficienca energjetike në krye të listës së çdo projekti

Zëvendëskryeministrja dhe njëherësh ministre e Infrastrukturës dhe Energjisë, Belinda Balluku është e pranishme në Ministerialin e zhvilluar në kuadër të COP 28, në Emiratet e Bashkuara Arabe.

Në një prononcim për mediet, Balluku u shpreh se, 123 vende kanë firmosur një deklaratë të përbashkët, me angazhime të mirëfillta për çdo qeveri.

“Sot ka qenë një tjetër ditë e rëndësishme në COP 28 që zhvillohet në Dubai.

Një javë totalisht e fokusuar tek ndryshimet klimaterike dhe të gjithë aksionet që duhen ndërmarrë globalisht për të shpëtuar planetin tokë.

Ka pasur takime të liderëve, të mbarë botës, por është vazhduar edhe me takime të tjera në nivelin Ministerial, siç ishte dita e sotme, ku 123 vende kanë firmosur një deklaratë të përbashkët, me angazhime të mirëfillta për çdo qeveri”, tha Balluku.

Zv/kryeministrja nënvizoi se, “një nga angazhimet më të rëndësishme është ai i trefishimit të fuqisë së instaluar të burimeve të rinovueshme në shkallë globale deri në vitin 2023 me 11 mijë gigavat-orë”.

Gjithashtu, shtoi Balluku, “jemi angazhuar që në vitet në vazhdim ne do të kemi një rritje të mbrojtjes së eficiencës së energjisë me 2% akoma më shumë, nga 2% në 4%.

Në ndërkohë, duhet vendosur eficienca energjetike në krye të listës së çdo projekti, të çdo politike dhe të çdo angazhimi qeveritar për këto 123 vende, të cilat kanë pranuar këtë deklaratë”.

Zv/kryeministrja Balluku u shpreh se, “për t’i arritur të gjitha këto, shtetet janë angazhuar të adoptojnë politikat e tyre lokale dhe gjithashtu të vendosin targete të larta dhe të fokusohen në rritjen e kapaciteteve të energjisë së rinovueshme, si dhe të eficiencës së energjisë”.

Gjithashtu, vijoi ai, “kanë marrë angazhim 123 shtete, të njohin dhe të adresojnë nevojën për bashkëpunim më të ngushtë ndërkombëtar, bazuar në inovacion dhe në teknologjitë e reja që përdoren për prodhimin e energjisë, por edhe për eficiencën energjetike”.

“Duhet thënë se në këtë tryezë të nivelit të lartë, ku morën pjesë të gjithë ministrat, përfaqësues të energjisë dhe të klimës për 123 vende, u shpreh qartë se çdo vend duhet që ta kostumizojë këtë politikë, duke arritur kështu të gjitha targetet për të ardhmen”, theksi Balluku.

“Gjatë Ministerialit të zhvilluar në kuadër të COP 28, sot në emër të qeverisë shqiptare dhe në emër të Kryeministrit Rama, kam arritur që të paraqes të gjitha arritjet në fushën energjetike për sa i përket diversifikimit të burimeve të rinovueshme që Ministria e Infrastrukturës dhe Energjisë ka ndërmarrë, sigurisht të gjitha projektet e reja, të cilat do të kontribuojnë në ato targete që unë përmenda, por edhe në politikat që qeveria shqiptare do të ndërmarrë në të ardhmen dhe sidomos të gjithë incentivat dhe i gjithë motivimi që ne kemi dhënë për eficiencën e energjisë duke qenë të bindur se është çelësi i suksesit për të arritur të gjitha targetet e mundshme”, përfundoi zv/kryeministrja Balluku.