Zelensky: Rusia po shmang paqen, përderisa sulmet ajrore vazhdojnë

Presidenti ukrainas, Volodymyr Zelensky ka akuzuar Rusinë se po nuk tregon interes për t’i dhënë fund luftës, përderisa vala e sulmeve ajrore në qytetet ukrainase vazhdon.

“Ata që duan që lufta të përfundojë sa më shpejt që të jetë e mundur, nuk veprojnë në këtë mënyrë”, shkroi Zelensky në X duke iu referuar gatishmërisë së pretenduar të Moskës për të ndalur luftimet

”Gjatë javës së kaluar, rusët lëshuan mbi 1 020 dronë sulmues, gati 1 360 bomba ajrore të drejtuara dhe më shumë se 10 raketa të llojeve të ndryshme”, shtoi ai.

Ndërsa Zelensky ka rënë dakord në parim për një armëpushim 30-ditor të propozuar nga Shtetet e Bashkuara, presidenti rus Vladimir Putin ka vendosur kushte në marrëveshje dhe nuk i ka lehtësuar kërkesat e tij.

Ministria ruse e Mbrojtjes ka raportuar gjithashtu se Ukraina ka nisur sulme të përsëritura me dron kundër Rusisë.

Zelensky u bëri thirrje aleatëve ndërkombëtarë të Ukrainës që të vazhdojnë të ofrojnë sisteme të mbrojtjes ajrore për të mbrojtur më mirë vendin, ndërsa i bëri thirrje Evropës dhe SHBA-së që të ushtrojnë presion të unifikuar ndaj Rusisë për t’i dhënë fund luftës dhe për të punuar drejt një paqeje të drejtë dhe të qëndrueshme.

“Nevojiten masa vendimtare, duke përfshirë sanksionet që jo vetëm duhet të mbahen, por edhe të forcohen vazhdimisht”, shtoi ai.

Ukraina ka mbrojtur veten kundër pushtimit të plotë të Rusisë për më shumë se tre vjet me mbështetje të konsiderueshme perëndimore.