Trump po shikon mundësinë e zhvendosjes së disa ndeshjeve të Botërorit 2026!...

 Donald Trump po shqyrton mundësinë e zhvendosjes e disa ndeshjeve të Kupës së Botës 2026, e cila bashkëorganizohet nga Shtetet e Bashkuara, Meksika dhe Kanadaja, dhe shorti i të cilit është planifikuar për 5 dhjetor në Uashington, D.C. Kjo nëse ai e konsideron situatën në qytetet amerikane që presin ndeshjet "të rrezikshme".

Presidenti amerikan e diskutoi këtë mundësi gjatë një takimi informues me gazetarët në Zyrën Ovale të enjten në mbrëmje, kur u pyet për ndeshjet e Kupës së Botës të vitit të ardhshëm që do të zhvillohen në Seattle (gjashtë në Lumen Field) dhe San Francisco (gjashtë në Levi's Stadium).

"Këto qytete drejtohen nga ekstremistë të krahut të majtë që nuk dinë çfarë po bëjnë", tha ai. "Ne do të sigurohemi që këto ndeshje të zhvillohen në kushte të sigurta. Nëse mendojmë se një qytet mund të jetë sadopak i pasigurt për Kupën e Botës, do ta zhvendosim atë në një qytet tjetër."

Donald Trump tha se ishte në të njëjtën gjendje mendore edhe në lidhje me Lojërat Olimpike të vitit 2028, të planifikuara për në Los Angeles. Ai vazhdoi: "Siç ndoshta e dini, pas Uashingtonit, do të shkojmë në Memfis dhe qytete të tjera (duke iu referuar vendosjeve të njëpasnjëshme të Gardës Kombëtare).

Shumë shpejt, do të shkojmë në Çikago. Do të jetë e sigurt për Kupën e Botës. Nëse mendoj se nuk është e sigurt, do të zhvendosemi në një qytet tjetër. Nuk do të lejojmë që ndeshjet të luhen në një situatë të pasigurt. Do t'i ndryshojmë pak datat. Por shpresoj që gjithçka të shkojë mirë dhe nuk do të na duhet të zhvendosim asnjë ndeshje."