Putini do të përballet me median globale në Forumin Ekonomik të Shën Petërburgut

Presidenti rus, Vladimir Putin do të merret sot në pyetje nga gazetarët perëndimorë në Shën Petërburg, ndërsa lufta e tij ndaj Ukrainës vazhdon të jetë e ashpër dhe armiqësitë përshkallëzohen midis Iranit dhe Izraelit.

“Në ditën e parë të Forumit Ekonomik Ndërkombëtar të Shën Petërburgut (SPIEF) që organizohet çdo vit – Putini do të takohet me përfaqësues të agjencive ndërkombëtare të lajmeve për të paraqitur perspektivën e tij mbi çështjet globale”, tha Kremlini.

Në të kaluarën, seanca e pyetjeve dhe përgjigjeve, ka zgjatur disa orë.

Në qendër të vëmendjes ka të ngjarë të jetë, edhe një herë, lufta e Putinit kundër Ukrainës.

Forumi

Rusia e përdor forumin për t’u prezantuar para botës dhe për të sfiduar izolimin ndërkombëtar të kërkuar nga Perëndimi.

Përveç kësaj, SPIEF konsiderohet një vend për të anashkaluar sanksionet kundër vendit – të vendosura si rezultat i luftës.

Vetë Moska i përshkruan masat ndëshkuese si të paligjshme.

Një dialog biznesi Rusi-SHBA është planifikuar pas afrimit të dy vendeve që kur presidenti i SHBA-së, Donald Trump u rikthye në pushtet.

Sipas organizatorëve, rreth 22 000 pjesëmarrës nga 139 vende morën pjesë në ngjarjen më të madhe ekonomike të vendit, vitin e kaluar.

Putini planifikon të mbajë të premten një fjalim mbi politikat ekonomike  – siç bën çdo vit – dhe t’u përgjigjet pyetjeve në një panel.

Pavarësisht kontakteve të kufizuara ekonomike, shumë sipërmarrës nga vendet perëndimore marrin pjesë në forum.

Edhe pse Rusia vazhdon të shënojë rritje relativisht të lartë falë ekonomisë së luftës dhe shitjeve të mallrave, vendi po përballet me një inflacion të lartë dhe një normë të lartë interesi bazë, gjë që i bën investimet të kushtueshme.