Portugalia shpall masa emergjente për të forcuar rrjetin elektrik pas ndërprerjes masive të prillit

Autoritetet portugeze njoftuan të hënën një paketë masash për të forcuar sistemin elektrik të vendit, si përgjigje ndaj ndërprerjes masive të energjisë elektrike më 28 prill që la pjesën më të madhe të Portugalisë dhe Spanjës pa drita për disa orë.

Plani, i cili parashikon investime prej 137 milionë eurosh, synon rritjen e qëndrueshmërisë së rrjetit dhe përmirësimin e reagimit ndaj emergjencave të ngjashme.

Ministrja e Mjedisit dhe Energjisë, Maria Graça Carvalho, deklaroi se ky plan do ta vendosë vendin në një pozicion më të mirë për të përballuar krizat energjetike.

“Ne do të jemi në një pozicion më të mirë për të menaxhuar krizën dhe për të minimizuar pasojat e saj”, tha ajo në një deklaratë për shtyp.

Masat përfshijnë dyfishimin e centraleve me aftësi për “ndezje nga errësira” nga dy në katër, përforcimin e infrastrukturës kritike si spitalet me panele diellore dhe bateri rezervë, si dhe shpenzimin e 25 milionë eurove për burime emergjente energjetike.

Ndërprerja e energjisë në prill, e cila zgjati disa orë, preku transportin publik, bizneset, komunikimet dhe jetën e përditshme të qytetarëve, duke zbuluar dobësi serioze në rrjetin iberik të lidhur midis Spanjës dhe Portugalisë.

Sipas autoriteteve spanjolle, rrjeti nuk mundi të përballojë një rritje të papritur tensioni që filloi në jug të Spanjës dhe u përhap me shpejtësi.

Vetëm territoret ishullore nuk u prekën nga ndërprerja, ndërsa energjia elektrike u rikthye plotësisht mëngjesin pasues.

Për të rritur qëndrueshmërinë e rrjetit, autoritetet po shqyrtojnë edhe ndërlidhjen e mundshme midis Portugalisë dhe Marokut, e cila do të shtonte sigurinë energjetike përmes shkëmbimeve ndërkufitare.

Spanja aktualisht mbështetet në ndërlidhjet me Marokun dhe Francën, që ishin jetike për rikthimin e furnizimit në prill.

Ndërkohë, një panel i pavarur i ekspertëve të Bashkimit Evropian po kryen hetime mbi shkaqet e ndërprerjes.

Një raport paraprak sugjeron se ngjarja u shkaktua nga një seri rritjesh të pazakonta tensioni dhe ndërprerjesh të njëpasnjëshme në rrjetin spanjoll.

Raporti përfundimtar pritet në tetor.