Plani i Trump për Ukrainën: Kthimi i energjisë ruse në Evropë dhe investime të mëdha amerikane në Rusi

Plani i paqes i Presidentit të SHBA-së, Donald Trump,  për Ukrainën përfshin rivendosjen e rrjedhave të energjisë ruse në Evropë.

Bëhet fjalë për investime të mëdha amerikane në sektorin e metaleve të rralla të Rusisë dhe përdorimin e aseteve të ngrira ruse.

Sipas mediave të huaja, raportohet se planet e Trump janë të detajuara në propozimet e dhëna evropianëve në javët e fundit.

Ndër planet e presidentit amerikan janë që firmat financiare amerikane dhe bizneset e tjera të shfrytëzojnë 200 miliardë dollarë nga asete të ngrira shtetërore ruse për projekte në Ukrainë, duke përfshirë krijimin e një qendre të re të madhe të të dhënave të mundësuar nga termocentrali bërthamor Zaporizhia , i cili tani kontrollohet nga forcat ruse.

Mediat shkruajnë se kompanitë amerikane janë gjithashtu të gatshme të investojnë në sektorë strategjikisht të rëndësishëm në Rusi, siç janë minierat e metaleve të rralla dhe shpimet e naftës në Arktik, duke shtuar se rrjedha e energjisë ruse në Evropën Perëndimore dhe pjesën tjetër të botës do të rikthehet gjithashtu.