PAPA, VIZITË HISTORIKE NË SPANJË/ Mijëra besimtarë priten në aktivitetet e planifikuara nga 6 qershori

Papa Leo 14-të do të vizitojë Spanjën për herë të parë në një udhëtim shtatëditor me mesazh solidariteti për emigrantët. Vizita përfshin takime me liderë politikë, aktivitete fetare dhe ndalesa në qytete kryesore si Madrid dhe Barcelona.

Papa Leo XIV do të zhvillojë javën e ardhshme vizitën e tij të parë në Spanjë, një udhëtim që do të zgjasë shtatë ditë dhe pritet të tërheqë qindra mijëra besimtarë.

Vizita do të nisë më 6 qershor dhe do të përfundojë në Ishujt Kanarie, ku Papa do të takohet me emigrantët që kanë mbërritur në Evropë përmes rrugëve të rrezikshme detare.

Përfaqësues të organizatave humanitare thonë se kjo vizitë është një mesazh i fortë solidariteti dhe mbështetjeje për emigrantët.

Sipas të dhënave, më shumë se 3 mijë persona humbën jetën gjatë vitit 2025 duke u përpjekur të mbërrinin në Ishujt Kanarie.

Organizatorët thonë se mbi 500 mijë persona kanë shprehur interes për të marrë pjesë në aktivitetet e planifikuara.

Një nga momentet më të rëndësishme do të jetë mesha e madhe në sheshin qendror të Madridit.

Gjatë vizitës, Papa do të takohet me mbretin Felipe dhe mbretëreshën Letizia, ndërsa do të mbajë edhe fjalime para drejtuesve politikë të vendit.

Ai do të bëhet gjithashtu papa i parë që do t’i drejtohet parlamentit spanjoll.

Papa Leo pritet të vizitojë edhe Barcelonën, ku do të inaugurojë kullën më të re të bazilikës së famshme Sagrada Familia. Ai do të ndalet gjithashtu në Montserrat, një nga vendet më të njohura fetare në Spanjë.

Sipas mediave ndërkombëtare, gjatë qëndrimit Papa mund të zhvillojë edhe një takim privat me persona që kanë qenë viktima të abuzimeve seksuale nga klerikë katolikë.

Vatikani nuk e ka konfirmuar zyrtarisht këtë takim.