Papa Leo bisedë telefonike me presidentin palestinez/ Ati i Shenjtë: Të ndalet forca dhe zhvendosja e detyruar e popullsisë

Në një telefonatë me Presidentin Palestinez Mahmoud Abbas, Papa Leo XIV përsërit apelin e tij urgjent për mbrojtjen e civilëve dhe vendeve të shenjta, nevojën për të respektuar të Drejtën Ndërkombëtare Humanitare dhe për të refuzuar transferimin e detyruar të popullsisë mes dhunës në rritje në Gaza dhe Bregun Perëndimor.

Mes dhunës së vazhdueshme në Tokën e Shenjtë, Papa Leo XIV zhvilloi një bisedë telefonike të hënën në mëngjes me Mahmoud Abbasin, Presidentin e Shtetit të Palestinës.

Sipas një deklarate të lëshuar nga Zyra e Shtypit e Selisë së Shenjtë, Papa mori telefonatën nga Presidenti Abbas, gjatë së cilës ata diskutuan zhvillimet e fundit në konfliktin në Rripin e Gazës dhe dhunën në Bregun Perëndimor.

“Gjatë telefonatës, Ati i Shenjtë përsëriti apelin e tij që e Drejta Ndërkombëtare Humanitare të respektohet plotësisht, duke theksuar në veçanti detyrimin për të mbrojtur civilët dhe vendet e shenjta, ndalimin e përdorimit pa dallim të forcës dhe të zhvendosjes së detyruar të popullsisë”, thuhet në deklaratë.

"Duke pasur parasysh situatën tragjike humanitare", vazhdon ajo, "u vu theksi në nevojën urgjente për t'u ofruar ndihmë atyre që janë më të prekshëm nga pasojat e konfliktit dhe për të lejuar hyrjen adekuate të ndihmës humanitare".

Së fundmi, Papa kujtoi dhjetëvjetorin “e bekuar” të Marrëveshjes Gjithëpërfshirëse midis Selisë së Shenjtë dhe Shtetit të Palestinës, e nënshkruar më 26 qershor 2015 dhe në fuqi që nga 2 janari 2016./ Vatican News.