Observatori Sirian për të Drejtat e Njeriut: Gati 600 të vrarë nga përplasjet mes druzëve dhe beduinëve

Një grup monitorimi thotë se 594 persona janë vrarë gjatë dhunës së fundit në jug të Sirisë, e cila ka marrë një dimension sektar.

BBC shkruan se Observatori Sirian për të Drejtat e Njeriut (SOHR), me bazë në Mbretërinë e Bashkuar, ka raportuar për një shpërthim të madh dhune në provincën Suweida, që nga e diela.

Sipas SOHR, 300 anëtarë të pakicës fetare druze janë vrarë, duke përfshirë 146 luftëtarë dhe 154 civilë, prej të cilëve 83 janë ekzekutuar në mënyrë të menjëhershme nga forcat qeveritare. Gjithashtu, janë vrarë të paktën 257 pjesëtarë të forcave qeveritare dhe 18 luftëtarë beduinë, ndërsa 3 civilë beduinë janë ekzekutuar nga luftëtarët druzë.

Përleshjet nisën si pasojë e një mosmarrëveshjeje mes komuniteteve beduine dhe druze. Më tej, 15 ushtarë të tjerë qeveritarë raportohet se janë vrarë nga sulmet ajrore izraelite, të cilat Izraeli thotë se i ndërmorri për të mbrojtur druzët dhe për të detyruar forcat qeveritare të tërhiqen nga Suweida.

BBC shkruan se nuk ishte e mundur të verifikohej menjëherë saktësia e shifrave të SOHR.

Megjithatë, burime të sigurisë e vendosin numrin e viktimave në 300, ndërsa një tjetër organizatë monitoruese, Rrjeti Sirian për të Drejtat e Njeriut, ka dokumentuar vdekjen e të paktën 169 civilëve.

Të enjten është raportuar një qetësi e brishtë, pas tërheqjes së forcave qeveritare nga qyteti me shumicë druze, Suweida. Banorët kanë raportuar skena shkatërrimi, plaçkitje dhe trupa të pajetë nëpër rrugë.

Që nga e hëna, kolona luftëtarësh të qeverisë së re të Sirisë e udhëhequr nga islamistët kanë hyrë në qytet me justifikimin për të rivendosur rendin pas përplasjeve midis druzëve dhe beduinëve. Por më pas ndodhi përshkallëzimi i dhunës, si dhe përçarja e bashkësisë druze, feja e së cilës është një degëzim i islamit shiit, me një identitet dhe besime unike.

Qeveria siriane shpalli një armëpushim të mërkurën në mbrëmje, përpara tërheqjes së saj.

Megjithatë, një nga udhëheqësit më të rëndësishëm të druzëve, Sheik Hikmat al-Hajri, e refuzoi atë, duke kërkuar vazhdimin e luftimeve deri në “çlirimin e plotë të provincës nga bandat”, duke iu referuar forcave qeveritare.

Sheik Hajri, ndjekësit e të cilit udhëhoqën luftën kundër forcave të qeverisë, ka kërkuar të forcojë marrëdhëniet me Izraelin. Ndërkohë, fraksione të tjera të komunitetit druze në Suweida kanë zgjedhur të bashkëpunojnë me qeverinë e re islamiste të Sirisë.

Ekziston gjithashtu një komunitet i madh druz në Izrael dhe në Lartësitë e Golanit të pushtuara nga Izraeli.

Të enjten, kryeministri izraelit Benjamin Netanyahu deklaroi se Izraeli do të vazhdojë të mbrojë interesat e tij në Siri me forcë. Ndërhyrja e Izraelit, tha Netanyahu, kishte për qëllim mbrojtjen e druzëve, por edhe parandalimin e vendosjes së ushtrisë siriane në jug të vendit.

“Kjo do të jetë edhe politika jonë në të ardhmen, nuk do të lejojmë që forcat e ushtrisë siriane të hyjnë në rajonin në jug të Damaskut dhe nuk do të tolerojmë asnjë rrezik ndaj druzëve”, theksoi ai.

Të mërkurën, sulmet ajrore izraelite shkaktuan dëme të rënda në Ministrinë e Mbrojtjes së Sirisë në Damask dhe goditën afërsinë e pallatit presidencial, një përshkallëzim dramatik i sulmeve izraelite ndaj Sirisë që nga rënia e regjimit të Bashar al-Assad në dhjetor të vitit të kaluar.

Në një deklaratë televizive të mërkurën në mbrëmje, presidenti i përkohshëm i Sirisë, Ahmed al-Sharaa, e cilësoi ndërhyrjen izraelite si një përpjekje për të destabilizuar vendin.

“Ne gjendemi në zemër të një beteje për të mbrojtur unitetin e tokës sonë, dinjitetin e popullit tonë dhe qëndrueshmërinë e kombit tonë,” deklaroi ai. “Entiteti izraelit, që ka goditur vazhdimisht stabilitetin tonë dhe ka mbjellë përçarje që nga rënia e regjimit të mëparshëm, tani kërkon sërish të e kthejë tokën tonë të shenjtë në një skenë kaosi të pafund.”

Duke iu drejtuar komunitetit druze në Siri, ai shtoi: “Ne ju sigurojmë se mbrojtja e të drejtave dhe lirive tuaja është një nga prioritetet tona kryesore. Ne refuzojmë çdo përpjekje të huaj apo vendase, për të mbjellë ndasi.”