Merz: Paqja në Gaza mund të ulë tensionet politike në Gjermani

Kancelari gjerman Friedrich Merz shprehu shpresën se përfundimi i luftës në Gaza do të ndihmojë gjithashtu në uljen e tensioneve politike brenda Gjermanisë, të cilat janë shtuar për shkak të rritjes së incidenteve antisemitike që nga fillimi i konfliktit dy vjet më parë.

“Shpresoj shumë që qetësia të rikthehet edhe në vendin tonë,” tha Merz mbrëmë për televizionin “ARD” kur u pyet se çfarë do të nënkuptonte për Gjermaninë marrëveshja e armëpushimit dhe lirimi i pengjeve.

Ai shtoi se shpreson veçanërisht “që qytetarët hebrenj të ndihen sërish të sigurt dhe që këto incidente të patolerueshme antisemitike të mbeten pjesë e së kaluarës, ose të paktën të bëhen shumë më të rralla”.

Merz theksoi gjithashtu se “nuk do të ketë më arsye për të demonstruar në mbështetje të palestinezëve në Gjermani” sapo të vendoset paqja në Gaza.

Lufta në Gaza, e shkaktuar nga sulmi i udhëhequr nga Hamasi ndaj Izraelit më 7 tetor 2023, ka thelluar ndarjet edhe brenda Gjermanisë. Numri i incidenteve antisemitike është rritur ndjeshëm, ndërsa janë zhvilluar protesta të shumta kundër veprimeve ushtarake të Izraelit dhe mbështetjes së qeverisë gjermane për Izraelin.

Disa nga protestat janë kthyer në përleshje të dhunshme, dhe autoritetet kanë nisur herë pas here hetime ndaj pjesëmarrësve për përdorimin e sloganeve të ndaluara.

Pas një përparimi në bisedimet e paqes, Izraeli dhe grupi militant palestinez Hamas kanë rënë dakord për fazën e parë të një plani paqeje të propozuar nga presidenti amerikan.