Konservatorja e vijës së ashpër që mund të bëhet gruaja e parë kryeministre e Japonisë

Sanae Takaichi shpreson që brenda pak ditësh të arrijë atë që heroina e saj Margaret Thatcher bëri dikur: të bëhet gruaja e parë që mban postin më të lartë politik të vendit të saj.

Ish-prezantuesja televizive, një konservatore e thekur, u tha një grupi fëmijësh në fundjavë se kishte ëndërruar të bëhej kryeministre e Japonisë që në moshën 24-vjeçare, në një periudhë kur Thatcher dominonte politikën britanike.

"Pse? Sepse e dua Japoninë shumë," tha Takaichi kur u pyet pse dëshironte të bëhej kryeministre.

"Qëllimi im është të bëhem 'Zonja e Hekurt'," shtoi ajo në një paraqitje televizive fundjavën e shkuar.

Takaichi, sot 64 vjeç, mund të jetë më pranë se kurrë arritjes së atij qëllimi, në prag të një votimi për drejtimin e Partisë Liberal Demokrate, ku fituesi pritet të bëhet edhe kryeministër.

Kushdo që të triumfojë të shtunën do të marrë drejtimin e një partie që ka qeverisur Japoninë pothuajse pa ndërprerje për 70 vjet, por që sot gjendet në një krizë identiteti, pasi ka humbur shumicën në të dy dhomat e parlamentit, ndërsa një pjesë e madhe e të rinjve janë larguar drejt partive të sapokrijuara populiste.

Takaichi, një konservatore e vijës së ashpër që si adoleshente ishte bateriste heavy metal është pozicionuar si pasuese e ish-kryeministrit të ndjerë Shinzo Abe dhe platformës së tij ekonomike "Abenomics", e mbështetur mbi norma të ulëta interesi dhe shpenzime buxhetore të hapura.

Që prej hyrjes në politikë 32 vite më parë, ajo ka mbajtur disa poste të rëndësishme qeveritare, përfshirë atë të ministres së sigurisë ekonomike, politikës së sigurisë kibernetike dhe strategjisë së "Cool Japan" gjatë viteve 2010.

Ajo është gjithashtu vizitore e rregullt e faltores Yasukuni në Tokio, ku nderohen të rënët e luftës japoneze, përfshirë edhe disa kriminelë lufte.

Vizitat e Abes në këtë faltore shkaktuan protesta masive anti-japoneze në Kinë në vitin 2013. Si mentori i saj, edhe Takaichi mbështet rishkrimin e kushtetutës pacifiste të Japonisë.

Kur gara për drejtim nisi javën e kaluar, Takaichi shihej gjerësisht pas rivalit të saj Shinjiro Koizumi, 44 vjeç, djali karizmatik i një ish-kryeministri.

Por të hënën, Koizumi kishte rënë rreth 4 pikë përqindje pas Takaichit në një sondazh të anëtarëve të LDP-së nga agjencia Kyodo dhe ishte në pozicion mbrojtës.

Ai kërkoi ndjesë pasi u zbulua se mbështetësit e tij kishin fabrikuar komente të rreme në rrjetet sociale për të krijuar entuziazëm.

Kjo garë vjen pas humbjes së koalicionit të udhëhequr nga LDP-ja në të dy dhomat e parlamentit nën drejtimin e kryeministrit në largim Shigeru Ishiba, i cili zgjati më pak se një vit në detyrë.

Në nivel kombëtar, reputacioni i LDP-së mbetet i njollosur nga një skandal financiar politik i lidhur me ish-fraksionin e Abes brenda partisë.

Ndërkohë, shumë votues të rinj japonezë, që e shohin LDP-në si mbrojtëse të statu kuosë, janë orientuar drejt partive më të vogla populiste që promovojnë politika radikale dhe teori konspirative në një periudhë me vështirësi ekonomike në rritje.

Kjo pozitë e dobët do të thotë se udhëheqësi i ardhshëm i Japonisë do të duhet të ndërtojë ura me partnerë të rinj politikë.

Po ashtu, ai ose ajo do të përpiqet të shërojë përçarjen e thellë brenda LDP-së, ku krahu i djathtë dëshiron rikthimin e konservatorizmit tradicional dhe Abenomics, ndërsa krahu i majtë e sheh këtë qasje si shkakun kryesor të largimit masiv të votuesve.

Votimi i 4 tetorit do të përcaktohet nga votat e 295 deputetëve dhe edhe 295 të tjera që pasqyrojnë preferencat e rreth 916,000 anëtarëve të thjeshtë të LDP-së.

Sondazhet e fundit tregojnë se Koizumi ka mbështetjen e deputetëve me një raport afërsisht dy me një, por anëtarësia më e gjerë e partisë duket se favorizon lehtësisht Takaichin.

Mieko Nakabayashi, shkencëtare politike në Universitetin Waseda, tha se popullariteti i Takaichit në bazë pasqyron dëshirën e madhe për ndryshim politik në një epokë me çmime në rritje, paga nën inflacion dhe ndjesi të thelluar pasigurie gjeopolitike.

"Njerëzit nuk e dinë si është ajo në të vërtetë, por mendojnë se është interesante sepse është grua. Është diçka e ngjashme me zgjedhjen e Barack Obamës si president në SHBA: njerëzit ishin të emocionuar të tregonin se vendi kishte ndryshuar," tha Nakabayashi.

"Por kjo dëshirë për diçka të re gjithashtu tregon se ekziston një krizë," shtoi ajo. "Nuk mendoj se gratë e zakonshme punëtore e shohin atë si përfaqësuese."

Nakabayashi tha gjithashtu se disa mbështetës mund të po harrojnë qëndrimet e saj të ashpra të mëparshme, të cilat raportohet se i dhanë nofkën "Taliban Takaichi" nga ish-kryeministri Fumio Kishida.

Si ministre e komunikimeve në vitin 2016, Takaichi kërcënoi stacionet televizive me heqjen e licencës nëse transmetonin programe të konsideruara "politikisht të padrejta".

Si ministre për barazinë gjinore, ajo kundërshtoi ndryshimin e ligjit që parashikon trashëgiminë imperiale vetëm për meshkujt, dhe javën e kaluar përsëriti kundërshtimin ndaj martesave të së njëjtës gjini.

"Takaichi ka plot probleme, por kujtesa e njerëzve është e shkurtër," tha Nakabayashi.

Megjithatë, vëzhguesit e afërt vunë re se Takaichi ka zbutur retorikën e saj kohët e fundit, ndoshta duke pranuar se sfida kryesore në rast fitoreje do të ishte bashkimi i një partie të përçarë.

Javën e kaluar, ajo tha se do të kërkonte të rriste përqindjen e grave në kabinet.

Aktualisht, rreth 15 për qind e politikanëve në dhomën e ulët të parlamentit japonez, e cila ka më shumë fuqi, janë gra.

Jeff Kingston, shkencëtar politik në Universitetin Temple të Tokios, tha se përtej prirjes së Takaichit për shpenzime fiskale, dallimet reale të politikave midis kandidatëve kryesorë nuk ishin të mëdha.

"Nëse të moderuarit kanë të drejtë, atëherë kanë nevojë për një fytyrë të re si Koizumi," tha Kingston.

"Nëse Takaichi ka të drejtë, atëherë partia duhet të zhvendoset përsëri djathtas nën drejtimin e saj dhe të rikthehet tek ideologjia e Abes."

Me sondazhe që "tregojnë pakënaqësi reale ekonomike dhe ndjesinë se jeta e njerëzve është në një qorrsokak", LDP-ja "nuk mund ta paraqesë veten si zgjidhje nëse nuk e përdor këtë votim për të treguar se mund të zgjerojë elektoratin e saj", përfundoi ai.