Kondi: Shqipëria është rreshtuar me nxitim në konfliktet ndërkombëtare, ndryshe nga disa vende që po tregojnë neutralitet

Shqipëria në vorbullën e politikës së jashtme, kritika për rreshtim pa debat kombëtar.

Në një lidhje të drejtpërdrejtë me Ora News, analisti i çështjeve ndërkombëtare Sokol Kondi ngriti shqetësime mbi drejtimin që po ndjek politika e jashtme e Shqipërisë, duke e cilësuar atë si të nxituar dhe pa një diskutim të gjerë kombëtar.

"Shqipëria është rreshtuar shpejt në konfliktet ndërkombëtare, në një kohë kur shumë vende të tjera, përfshirë shtete të Bashkimit Evropian dhe Britaninë e Madhe, po tregojnë më shumë maturi, duke analizuar zhvillimet dhe duke ruajtur një qëndrim më të balancuar apo neutral."

Kondi thekson se vendime të tilla me peshë strategjike nuk janë shoqëruar me debat publik apo institucional. Ai nënvizon mungesën e konsultimeve në komisionet parlamentare dhe përjashtimin e opinionit publik nga procese që prekin drejtpërdrejt interesat kombëtare.

Sipas tij, rreshtimi i pakushtëzuar përkrah fuqive të mëdha shihet si një veprim pa një strategji të qartë afatgjatë, duke ngritur pikëpyetje mbi pavarësinë vendimmarrëse të vendit në arenën ndërkombëtare.

Analisti e konsideron këtë si pjesë të një qasjeje të përsëritur. Ai sjell në vëmendje edhe vendimin e mëhershëm për të pranuar në territorin shqiptar elementë të lidhur me konfliktin me Iranin, një hap që, sipas tij, nuk u ndërmor nga vende të tjera dhe që e përfshiu Shqipërinë në dinamika të ndërlikuara gjeopolitike.

Në këtë kontekst, Kondi apelon për më shumë transparencë, debat dhe përfshirje institucionale në hartimin e politikës së jashtme, duke theksuar se vendime të tilla kërkojnë konsensus të gjerë dhe një analizë të thelluar të pasojave që mund të sjellin për vendin.

Ndiqni intervistën e plotë: