Itali, qeveria ul taksën për karburantet

Italia ka ulur taksën e konsumatorëve për karburantet, në një përpjekje për të mbajtur çmimet nën kontroll, teksa vendi përballet me pasojat e konfliktit në Lindjen e Mesme.

Kryeministrja italiane Giorgia Meloni njoftoi një sërë masash për të luftuar rritjen e çmimeve të karburanteve dhe për të ndihmuar konsumatorët.

Ulja prej 25 centësh euro për litër në akcizën për benzinën, naftën dhe gazin e lëngshëm hyn në fuqi këtë të enjte.

Ndihma është e përkohshme, me projektligjin që fillimisht mbulon një periudhë prej 20 ditësh, me qëllim mbajtjen e kostove të naftës dhe benzinës nën 1.90 € për litër.

Në momentin kur masa u miratua nafta kushtonte rreth 2.10 euro për litër.  Si pjesë e paketës, qeveria planifikon të shpenzojë 608 milionë euro për lehtësime tatimore për të ndihmuar kompanitë e kamionëve të blejnë naftë.

Synimi është të parandalohet një rritje e çmimeve që konsumatorët do e ndjenin direkt te mallrat e konsumit.

Meloni tha se po punon për gjithçka që mundet për të mbrojtur konsumatorët italianë, ndërsa punon edhe për t’i dhënë fund konfliktit në Lindjen e Mesme.

“Karta sociale” e qeverisë për familjet me të ardhura të ulëta gjithashtu do të forcohet nga 500 milionë euro në 630 milionë euro këtë vit për të mbështetur fuqinë blerëse të kësaj kategorie.