Gëzim në familjen e JD Vance/ Zv.Presidenti bëhet baba për herë të katërt

Zëvendëspresidenti i Shteteve të Bashkuara, JD Vance, dhe bashkëshortja e tij, Usha Vance, kanë mirëpritur në jetë fëmijën e tyre të katërt, një djalë të quajtur Alec Neel Vance.

Lajmin e lumtur e bëri të ditur vetë Vance, duke njoftuar se foshnja lindi të dielën në Qendrën Mjekësore Ushtarake Kombëtare Walter Reed në Bethesda, Maryland.

"Jemi të emocionuar të njoftojmë se djali ynë, Alec Neel Vance, lindi këtë mëngjes. Usha dhe foshnja janë të shëndetshëm, ndërsa fëmijët tanë mezi prisnin të takonin vëllain e tyre të vogël", u shpreh zëvendëspresidenti amerikan.

Lindja e Alec shënon një moment historik, pasi ai konsiderohet fëmija i parë i lindur nga një zëvendëspresident amerikan në detyrë pas më shumë se 150 vitesh.

I porsalinduri i bashkohet tre fëmijëve të tjerë të çiftit: Ewan, 9 vjeç, Vivek, 6 vjeç dhe Mirabel, 4 vjeç.

JD dhe Usha Vance njihen që nga koha kur studionin në Shkollën e Drejtësisë në Yale, ku u diplomuan në vitin 2013. Që prej marrjes së detyrës si zëvendëspresident, Vance është shfaqur shpesh në vizita zyrtare i shoqëruar nga bashkëshortja dhe fëmijët e tij, duke e vendosur familjen në qendër të jetës së tij publike.