Demilitarizimi i zonave të Donjeskut, presidenti Zelensky: Trupat ruse të mos hyjnë në këtë territor

Presidenti ukrainas Volodymyr Zelensky deklaroi të enjten se Shtetet e Bashkuara po shtyjnë për krijimin e një “zone të lirë ekonomike” të demilitarizuar midis trupave ruse dhe ukrainase në lindje të vendit, si pjesë e një marrëveshjeje të mundshme për t’i dhënë fund luftës.

Sipas Zelensky-t, propozimi parashikon tërheqjen e forcave ukrainase nga disa territore të rajonit të Donetskut, ndërsa trupat ruse – sipas kompromisit të sugjeruar  nuk do të hynin në këto zona, të cilat tashmë zyrtarë amerikanë i kanë quajtur “zonë të lirë ekonomike”.

Ai theksoi se plani nuk përfshin detyrimin e Rusisë për t’u tërhequr nga rajoni i Donetskut, apo nga zonat që kontrollon në Kherson dhe Zaporizhzhia. Megjithatë, sipas tij, parashikohet largimi i trupave ruse nga rajonet e Kharkivit, Dnipropetrovskit dhe Sumit.

Zelensky shtoi se dy pikat kryesore të mosmarrëveshjes me SHBA-në lidhur me marrëveshjen janë statusi i rajonit të Donetskut dhe kontrolli i ardhshëm mbi centralin bërthamor të Zaporizhzhias.

“Kemi dy tema kryesore që mbeten të hapura: territori i Donetskut dhe gjithçka që lidhet me të, si edhe centrali bërthamor i Zaporizhzhias. Këto çështje vazhdojmë t’i diskutojmë,” deklaroi Zelensky në konferencën e tij për shtyp në Kiev.