Britania nis kthimin e emigrantëve: Të parët ndalohen sipas marrëveshjes së re me Francën

Të parët emigrantë janë ndaluar në kuadër të marrëveshjes së riatdhesimit mes Mbretërisë së Bashkuar dhe Francës.

Ndalimet ndodhën të mërkurën, kur persona mbërritën në Dover, në ditën e parë të zbatimit të këtij skenari pilot.

Sipas Ministrisë së Brendshme britanike, personat që mbërritën pasditen e së mërkurës do të mbahen në qendra për largimin e emigrantëve, para se të kthehen në Francë.

Kryeministri Sir Keir Starmer deklaroi: “Kemi ndaluar emigrantët e parë të paligjshëm sipas marrëveshjes së re, përpara se t’i kthejmë në Francë.

Nëse shkelni ligjin për të hyrë në këtë vend, do të përballeni me kthimin pas. Kur them se nuk do të ndalem për të siguruar kufijtë tanë, e kam seriozisht.”

Ministrja e Brendshme, Yvette Cooper, shtoi: “Dje, në bazë të kushteve të kësaj marrëveshjeje të re historike, grupi i parë i personave që kaluan Kanalin u ndalua menjëherë pas mbërritjes në Western Jet Foil dhe tani do të mbahen në paraburgim deri në kthimin e tyre në Francë.

Kjo dërgon një mesazh për çdo emigrant që mendon të paguajë bandat e krimit të organizuar për të shkuar në Mbretërinë e Bashkuar: ata do të rrezikojnë jetën dhe do të humbasin paratë, nëse hipin në një gomone.”

Britania ka ratifikuar një traktat me Francën, sipas të cilit ata që hyjnë në MB me gomone mund të ndalohen menjëherë dhe të kthehen përtej Kanalit.

Mendohet se rreth 50 emigrantë do të kthehen çdo javë në Francë, ndërsa ky numër pritet të rritet deri në fund të vitit.

Sir Keir po përballet me pakënaqësi të vazhdueshme publike lidhur me emigracionin masiv, përfshirë protesta jashtë hoteleve që strehojnë emigrantë në të gjithë Britaninë, nxitur pjesërisht nga raportimet për krime të kryera nga azilkërkues.

Në përpjekje për të ulur tensionet dhe për të treguar se qeveria po e trajton seriozisht këtë çështje, Downing Street deklaroi të hënën se policia duhet të jetë në gjendje të publikojë informacion mbi përkatësinë etnike të të dyshuarve për krime, pas kërkesave për më shumë transparencë.

Marrëveshja e Sir Keir me Francën do të thotë që rreth 800 persona do të kthehen në Francë deri në fund të vitit, krahasuar me dhjetëra mijëra emigrantë që kanë mbërritur që kur Partia Laburiste fitoi zgjedhjet në korrik të vitit të kaluar.

Kjo marrëveshje e njohur si “një brenda, një jashtë”, parashikon gjithashtu që një numër i ngjashëm azilkërkuesish me lidhje familjare në Mbretërinë e Bashkuar të pranohen nga Britania.