Banka e Anglisë ul normën e interesit në 4%, niveli më i ulët që nga marsi i vitit 2023

Banka e Anglisë uli të enjten normën e saj kryesore të interesit me 0.25 pikë përqindjeje, duke e çuar në 4%, ndërsa përpiqet të nxisë një ekonomi të ngadalësuar dhe të përballojë pasiguritë e brendshme dhe globale.

Ky është ulja e pestë që nga gushti 2024, kur norma ishte në një nivel rekord 16-vjeçar prej 5.25%.

Vendimi u prit gjerësisht nga tregjet financiare, por thekson dilemën që përballet Komiteti i Politikës Monetare i bankës: balancimin midis nevojës për të ulur inflacionin dhe mbështetjes për ekonominë në një klimë globale të trazuar nga luftërat tregtare dhe rritjet e mundshme të taksave.

Komiteti votoi me një diferencë të ngushtë 5-4 në favor të uljes së normës.

Norma bazë, e cila ndikon drejtpërdrejt mbi hipotekat, kreditë konsumatore dhe ato të biznesit, është tani në nivelin më të ulët që nga marsi 2023.

“Do të ketë shpresa se nëse kreditë bëhen më të lira, kjo do të ndihmojë në rritjen e besimit të konsumatorëve dhe bizneseve, por ka ende shumë për të bërë,” deklaroi Susannah Streeter, drejtoreshë e parave dhe tregjeve në Hargreaves Lansdown.

Megjithatë, ajo paralajmëroi se pasiguritë mbi politikat fiskale mund të frenojnë entuziazmin:

“Spekulimet për rritje të reja taksash në Buxhetin e Vjeshtës mund të mbajnë familjet dhe kompanitë të kujdesshme.”

Inflacioni mbi objektiv, por në rënie

Edhe pse inflacioni i çmimeve të konsumit qëndroi në 3.6% për periudhën 12-mujore deri në qershor – dukshëm mbi objektivin prej 2% të bankës – politikëbërësit e shohin këtë si një rritje të përkohshme, kryesisht për shkak të kostove të larta të energjisë. Parashikimet e bankës sugjerojnë një rikthim të inflacionit në objektiv brenda vitit të ardhshëm.

Papunësia në rritje, presion mbi qeverinë

Sipas të dhënave më të fundit, shkalla e papunësisë në Mbretërinë e Bashkuar është rritur në 4.7% në tre muajt deri në maj – niveli më i lartë në katër vite – duke sinjalizuar ndikimin e rritjeve të mëparshme të taksave dhe pasigurive të tregjeve ndërkombëtare mbi bizneset vendase.

Ndërkohë, ekonomia britanike u rrit me 0.7% në tremujorin e parë të vitit 2025, pas një gjysme të dytë të dobët gjatë vitit të kaluar, duke e bërë vendimin për lehtësim monetar edhe më të domosdoshëm.

Politikëbërësit tani përballen me presionin për të ruajtur një ekuilibër delikat mes stabilitetit financiar dhe mbështetjes për rritjen ekonomike, ndërsa vendi përgatitet për sfida të reja fiskale dhe gjeopolitike.