Skandali, Ministria: OST pezulloi kontratën 12 mln euro me kompaninë "DH Albania"

Pas publikimit në mediat online se kompania shtetërore OST kishte lidhur një kontratë me vlerë 12 mln euro me "DH Albania", Ministria e Energjisë njofton se kompania e ka pezulluar në mënyrë të njëanshme kontratën.

"Por ndërkohë, e njëjta kompani rezulton se ka fituar pak a shumë në të njëjtën kohë, një tender të dytë me vlerë 1.2 miliardë lekë nga Operatori i Sistemit të Transmetimit, kompania publike që menaxhon linjat e tensionit të lartë në Shqipëri dhe që mbikëqyret nga ministria e Z. Gjiknuri", shkruan Birn. 

Njoftimi nr. 44 i 5 nëntorit 2018 i Prokurimeve Publike [link] përmban njëri pas tjetrit njoftimin e shpalljes fituese të kompanisë DH Albania, degë e kompanisë së huaj “Dunwel Haberman”, të një kontrate për ndërtimin e një linje të transmetimit të energjisë elektrike 220 volt që duhet të shërbejë për të lidhur Burrelin me Peshkopinë.

Kompania "DH Albania" u përfshi në një skandal falsifikimi për përfitimin e tenderit prej 18 mln eurosh për ndërtimin e një loti të Unazës së Re në zonën e Astirit.

Ministria thekson në komunikatën e shkurtër se detajet e mëtejshme do të jepen gjatë ditës së nesërme.

Tri ditë më parë, Autoriteti Rrugor Shqiptar urdhëroi pezullimin e aktivitetin ndërtimor për lotin Nr.1 të segmentit, që shtrihet nga Ura e Lanës deri tek mbikalimi i sheshit Shqiponja.

Pezullimi erdhi pasi kompania Dunwell Haberman (kompania mëmë e DH Albania), kishte falsifikuar një dokument sipas të cilës ajo ishte krijuar në vitin 1998 në shtetin Delaware, shtet amerikan i cili nuk publikon emrat e pronarëve të kompanive.