Parlamenti Europian miraton amendamentin me 15 kushtet për qeverinë Rama para nisjes së negociatave

Qeveria shqiptare do të duhet të paraqesë një raport të plotë mbi ngërçin në sistemin e drejtësisë dhe në vlerësimin e zgjedhjeve vendore para konferencës ndërqeveritare të BE. Parlamenti evropian ka miratuar një rezolutë ku kërkohet që hapi I rradhës për negociatat të kalojë vetëm pasi të jenë plotësuar 15 kushtet

Parlamenti Evropian ka miratuar me 388 vota pro, 280 kundër dhe 19 abstenim amendamentin e Grupit të Partive Popullore Europiane, ku kërkohet që Shqipëria të përmbushë 15 kushtet e KE përpara thirrjes Konferencës Ndërqeveritare të parë me shtetet antare

Këto kushte u vendosën me propozimin e Gjermanisë, Francës, Hollandës, Danimarkës e Spanjës në mars të këtij viti. Pro amendamentit votuan Grupi Liberal dhe ai Konservator si dhe deputetë nga parti te majta dhe të djathta.

Grupi Social Demokrat në qëndrimet e dhëna është shprehur kundër amendamentit me argumentin se zbehet jehona festive e samitit të Zagrebit ku u miratua propozimi për çeljen e bisedimeve.

Në kushtet e vendosura për Shqipërinë renditet miratimi i Reformës Zgjedhore, funksionimi i Gjykatës Kushtetuese, asaj të Lartë si dhe nisja nga funksioni i SPAK. Lufta ndaj korrupsionit si dhe ulja e numrit të shqiptarëve që kërkojnë azil mbetet një kërkesë e vazhdueshme. Ndërkaq edhe një herë kërkohet vendimi i qartë për vlefshmërinë e zgjedhjeve vendore. Në këto pika deri më tani vetëm SPAK duket se ka kaluar provën, ndërsa për reformën zgjedhore partitë janë në prag të arritjes së marrëveshjes. Ligji i medias që solli dhe reagimin e Komisionit të Venecias i cili kërkoi ndalimin e paketës së antishpifjes.

Avancimi në procesin e kthimit dhe kompensimit të pronave si dhe të drejtat e minoritetit po ashtu konsiderohen thelbësore.

Megjithatë në takimin e Konferencës Ndërqeveritare përfaqësuesit e Shqipërisë do të duhet të paraqesin një raport të plotë për secilën nga pikat për të vijuar me fazën e rradhës së negociatave

15 Kushtet 

 1. Miratimi i reformës zgjedhore;

2. Funksionimi i Gjykates Kushtetuese;

3. Funksionimi i Gjykatës së Lartë;

4. Finalizimi i ngritjes se strukturave kundër krimit të organizuar dhe anti-korrupsionit/Funksionimi i SPAK;

5. Forcimi i luftës kundër korrupsionit dhe krimit të organizuar, në bashkëpunim me vendet anëtare dhe nëpërmjet Plan Veprimit për adresimin e krimit financiar;

6. Ulje e numrit të azilkërkuesve;

7. Rishikimi i Ligjit të Medias në linjë me rekomandimet e Komisionit të Venecies;

8. Vazhdimi i Reformës në Drejtësi;

9. Track Records-Iniciimi dhe përfundimi i proceseve gjyqësore të shkallës së parë të zyrtarëve të lartë dhe politikanëve;

10. Progres në reformën e administratës publike;

11. Zbatimi i reformës zgjedhore;

12. Vendimi për ligjshmërinë e zgjedhjeve lokale 2019;

13. Miratimi i Akteve nënligjore të Ligjit për Pakicat Kombëtare;

14. Miratimi i Ligjit (të amenduar) të Censit;

15. Avancimi i procesit të regjistrimit të pronave.