Ish-drejtori i burgjeve, Artur Zoto dënohet me 5 vite burg

Pas një viti hetimi dhe gjykimi,  ish-drejtori i Burgjeve, Artur Zoto, është dënuar nga Gjykata e Krimeve të Rënda me 5 vite burg. Zoto u shpall fajtor për akuzën e korrupsionit, akuzë kjo që u ngrit pas dëshmisë së ish-vartësit të tij, Iljaz Labi, i cili ka fituar statusin e bashkëpunëtorit të drejtësisë. 

Gjykata e Krimeve të Rënda ka shpallur fajtor dhe ka dënuar me 5 vite burg ish-kreun e Burgjeve, Artur Zoto. 

Vendimi u shpall në mesditë nga togat e zeza, të cilët kanë aprovuar kërkesën e prokurorisë. 

Më heret avokati i ish-kreut të Burgjeve, Ardian Leka, kërkoi pafajësi për klientin e tij. 

Ai tha para gjykatës së nuk vërtetohet akuza e korrupsionit në bashkëpunim për  ish-kreun e burgjeve. 

Sipas avokatit, në asnjë rast prokuroria nuk ka vërtetuar se Zoto ka bashkëpunuar me ish-vartësin e tij Iljaz Labin, i cili ka tashmë  statusin bashkëpunëtorit të drejtësisë. 

"Në përgjime del se Iljaz Labi nuk ka pasur asnjë komunikim me Zoton", shprehet avokat Ardian Leka.

Zoto u arrestua rreth një vit më parë pas bashkëpunimit të Iljaz Labit me  prokurorinë.

Ky i fundit tregoi se Zoto përfitonte 20 milionë lekë nga biznesmenët që merrnin pjesë në tenderat e ushqimit.  

Pas vendimit avokati mbrojtës i tij u shpreh se do ta apelojë vendimin.