Rezoluta çame sërish në komision, pritet relacioni përfundimtar
Nga OraNews Përditësimi i fundit 10 Prill 2013, 08:55
Komisioni i jashtëm do të shqyrtojë sërish sot rezolutën për zgjidhjen e çështjes çame ku pritet që të paraqitet edhe relacioni përfundimtar.Në mbledhjen e kaluar demokratët dhe socialistët kërkuan më shumë kohë në dispozicion për të shqyrtuar projektrezolutën e çështjes çame, e depozituar disa muaj më parë nga PDIU.Ndërsa kreu i PDIU-së, Shpëtim Idirizi, u shpreh se ishte dakord që të rishikonte draftrezolutën, duke e përqëndruar atë vetëm në tri nene, heqjen e ligjit të luftës me Greqinë, aktivizimin e traktatit të miqësisë dhe kthimin e të drejtave të shqiptarëve të Çamërisë.Në mbledhjen e kaluar komisioni i Jashtëm u përfshi në debate të ashpra për shqyrtimin e projektrezolutës për zgjidhjen e çështjes çame. Dy deputetët e PDIU-së, Shpëtim Idrizi dhe Dashamir Tahiri, shkëmbyen replika me tone të larta me kryetarin e PBDNJ-së, Vangjel Dule, i cili që në fillim të mbledhjes kundërshtoi shqyrtimin e projektrezolutës.Votimi i rezolutës çame në seancë plenare është një test i rëndësishëm politik jo vetëm për Partinë për Drejtësi Integrim dhe Unitet që e ka depozituar këtë nismë në Kuvend, por edhe për partitë e mëdha parlamentare.PDIU e ka kushtëzuar koalicionin paraelektoral me partitë e mëdha me qëndrimin që ato do të mbajnë në raport me votimin e rezolutës çame në Kuvend.Ndërkohë disa ditë më parë, kreu i PS-së Edi Rama propozoi një projekt-rezolutë alternative për zgjidhjen e çështjes çame, projekt që u mirëprit edhe nga kreu i PDIU-së Shpërtim Idrizi.Rama theksoi se Këshilli i Ministrave duhet ta përfshijë çështjen çame si një çështje politike në marrëdhëniet diplomatike me Greqinë dhe të raportojë dy herë në vit për ecurinë e saj.Në fund të vitit që shkoi, PDIU, iu drejtua Kuvendit me një rezolutë përmes të cilës kërkohet zgjidhje e çështjes came, ndërsa kreu i kësaj force politike, Shpëtim Idrizi, ka apeluar në vazhdimësi edhe individualisht deputetët që ta votojnë këtë iniciativë. REZOLUTA1. Rezoluta njeh, mbështet, dhe angazhohet për nevojën e restaurimit të të gjithë të drejtave të shqiptarëve çamë, dikur nënshtetas grekë, në përputhje me rrethanat e reja, sipas parimeve të legjislacionit ndërkombëtar mbi gjenocidin, spastrimin etnik, procesin e rregullt ligjor, mosdiskriminimin mbi bazë të kombësisë, e parimet e tjera të ndërlidhura me to si dhe frymën e Traktatit të Miqësisë midis dy vendeve.2. Kërkon rivendosjen e të drejtave themelore të shtetasve shqiptarë, ish-shtetas grekë, që përfshin rikthimin e pronave, njohjen e të drejtës së riatdhesimit, njohjen e të drejtës së rimarrjes së shtetësisë, dhe të të drejtave të tjera të pakicave kombëtare.3. Kërkon shfuqizimin shprehimisht të Ligjit grek të Luftës nr. 2636 dhe 2637/1940 i shpallur me dekret mbretëror në vitin 1940 akoma në fuqi, në veçanti pjesën e ligjit që mban sekuestron konservative të pasurive shqiptare.4.Kërkon shtrirjen e efekteve të ligjit grek 1540/1985 “për rregullimin e refugjatëve”, tek të gjithë shtetasit grekë të larguar si pasojë e konfliktit civil, pa diskriminim kombësinë e tyre, ligj që bie në kundërshtim me shumë akte ndërkombëtare, për mosdiskrimimin mbi bazë kombësie, race, feje, etj;5.Kërkon nga qeveria e Republikës së Shqipërisë, që së bashku me qeverinë e Republikës së Greqisë, të riaktivizojë Komisionet e Posaçme Dypalëshe, të sanksionuara në Traktatin e Miqësisë, të shqyrtojnë çështjen, të njohin përmasat e saj, të përpunojnë zgjidhjet e duhura në këtë drejtim;6. Ngarkon Ministrinë e Punëve të Jashtme që të mbrojë të drejtat e shqiptarëve, të padëbuar nga trojet e tyre amtare dhe të kërkojë njohjen e statusit të minoritetit etnik për ata;7. Kërkon ngritjen në Paramithi dhe Filat, të dy lapidarëve, që do të përkujtojnë gratë, pleqtë, e fëmijët, viktima të pafajshme të krimeve kryera nga njësitë paramilitare greke.8. Kërkon mundësinë e ngritjes apo përkujdesjes për varrezat e çamëve, ish-qytetarëve grekë, të vrarë gjatë gjenocidit grek;9. Ngarkon Ministrinë e Arsimit dhe të Shkencës që të pasqyrojë, në mënyrë të përshtatshme dhe në proporcionalitet, historinë e kësaj pjese të popullsisë shqiptare në tekstet shkollore;10. Ngarkon Ministrinë e Turizmit, Kulturës, Rinisë dhe Sporteve që, në kuadër të marrëveshjeve dypalëshe me ministrinë homologe të Republikës së Greqisë, të promovojë vlerat kulturore të tyre dhe objektet kulturore që gjenden jashtë territorit të Republikës së Shqipërisë si dhe Ministrisë së Arsimit dhe të Shkencës t’i kërkojë Ministrisë homologe të nxisë heqjen në tekstet greke të referimeve fyese dhe diskriminuese ndaj popullsisë çame;11. Ngarkon qeverinë shqiptare, që në përputhje me këtë Rezolutë, t’i shprehë palës greke në kontaktet diplomatike qëndrimin e Republikës së Shqipërisë në lidhje me këtë problem;12. Ngarkon Ministrinë e Punëve të Jashtme që këtë Rezolutë t’ua bëjë të njohur qeverive dhe parlamenteve të shteteve anëtare të Bashkimit Evropian dhe NATO-s, dhe institucioneve ndërkombëtare ku Shqipëria është anëtare.13. I rezervon vetes të drejtën që në rast reagimi refuzues të palës greke, për ta konsideruar problemin në dritën e akteve ndërkombëtare mbi diskriminimin, lëvizjen e lirë, të drejtat themelore të njeriut në përgjithësi, ta paraqesë çështjen në instancat ndërkombëtare adekuate.
