Shqiptarët festojnë fitoren e Strugës
Nga OraNews Përditësimi i fundit 8 Prill 2013, 07:28
Struga ka festuar fitoren e shqiptarëve në raundin e dytë të zgjedhjeve lokale. Kandidati i PDSH-së Ziadin Sela ka fituar kundrejt kandidatit maqedonas Vlladimir Koçoskit, në një garë të fortë etnike mes partive shqiptare dhe atyre maqedonase."Sot fitorja është shumë e ëmbël sepse keni qenë ju që ata bashkë me mua shënuam fitore. Ju sot keni fituar mbi Nikolla Gruevskin, keni fituar mbi Branko Cërvenkovskin, prandaj unë ju uroj juve për këtë fitore" tha Sela.Gjatë të dielës në Maqëdoni u mbajt raundi i dytë i zgjedheve për 29 kryetarë komunash dhe për qytetin e Shkupit, si njësi e veçantë administrative.Ndërkohë sipas komisionit shtetëror të zgjedhjeve në Tetovë fitoi Teuta Arifi nga BDI kundrejt Sadi Bexhetit nga PDSH. Në Gostivar fitoi Nevzat Bejta nga BDI kundër Rufio Osmanit nga RDK.Sipas rezultateve të para që ka dhënë Komisioni Shtetëror i Zgjedhjeve, partia maqedonase në pushtet ka fituar 16 komuna, ndërsa BDI të gjitha komunat shqiptare, pos Strugës, ku fitues ka dalë kandidati i Partisë Demokratike Shqiptare.Në raundin e parë të zgjedhjeve, të zhvilluar më 24 mars, janë zgjedhur 49 kryetarë të komunave.Partia e kryeministrit maqedonas VMRO-DPMNE fitoi në 16 komuna.Nikola Gruevski lideri i VMRO-DPMNE përmes një konference ka shpallur fitoren e partisë së tij në balotazhin e zgjedhjeve lokale. Ai theksoi se votimet e së dielës ishin të suksesshme dhe se kjo është fitore e të gjithë qytetarëve dhe Maqedonisë.Lideri i opozitës maqedonase dhe LSDM-së, Branko Cërvenkovski ka theksuar se zgjedhjet lokale në Maqedoni janë plotësisht jolegjitime. Ali Ahmeti I BDI-së tha se partia e tij ka shënuar një fitore të thellë në historinë e saj të veprimit politik. Lideri i PDSH-së, Menduh Thaçi deklaroi se procesi i votimeve gjatë balotazhit ka pasur shumë parregullsi dhe se të gjitha partitë ishin bashkuar kundër PDSH-së.
