Maqedoni, në mesnatë nis fushata për zgjedhjet lokale
Nga OraNews Përditësimi i fundit 3 Mars 2013, 11:15
Në mesnatë fillon fushata zgjedhore për zgjedhjet lokale të 24 Marsit në Maqedoni. Fushata do të zgjas 20 ditë, ndërsa më 23 mars do të jetë heshtja zgjedhore.Parlamenti mbrëmë miratoi ndryshimet e kodit zgjedhor, duke mundësuar që partitë e opozitës deri më 8 mars të dorëzojnë listat zgjedhore të kandidatëve për kryetar komunash dhe këshilltarë komunal.Ky afat vazhdohet për herë të dytë pas marrëveshjes midis pozitës dhe opozitës maqedonase, me ndërmjetësimin e Bashkimit Evropian. Opozita maqedonase pas bojkotit të paralajmëruar vendosi që të marrë pjesë në zgjedhje, pas një marrëveshje me disa pika të firmosur në praninë e evrokomisionerit për zgjerim të BE-së, Shtefan Fyle dhe raportuesit të Parlamentit Evropian, Richard Hovit.Kandidatët e listave të reja që do të dorëzohen deri më 8 mars, pritet të kalojnë në filtrin e Komisionit për Lustracion, në një afat prej 24 orëve. Zgjedhjet lokale do të zhvillohen në 80 komuna dhe Qytetin e Shkupit, ku shqiptarët do të marrin pjesë në zgjedhje në rreth 40 komuna. Mbi 1.743.403 qytetarë do të shfrytëzojnë të drejtën e votës në zgjedhjet e 24 marsit.
