Serbia i përgjigjet ashpër Tiranës zyrtare: Po kontribuoni në destabilitetin e jugut të Serbisë
Nga OraNews Përditësimi i fundit 22 Janar 2013, 17:25
Reagon ashpër Ministria e Jashtme serbe për deklaratat e Qeverisë së Shqipërisë, lidhur me heqjen e përmendores në Preshevë, më 20 janar. Ministria e Jashtme serbe konsideron se fjalori i përdorur nga Kryeministri nxit aktivitetet e mëtejshme të orientuara në destabilitetin e situatës në jug të Serbisë, por edhe në rajonin e gjerë, në vendet fqinje ku banojnë shqiptarë."Kualifikimet dhe akuzat e orientuara kundër Qeverisë së Serbisë, janë nën çdo dinjitet dhe në kundërshtim të plotë me bindjet e dhëna personalisht nga ana e kryeministrit shqiptar. Berisha gjatë vizitës së mëhershme të Ministrit të Jashtëm të Serbisë Mërkiç në Tiranë, se Shqipëria është e gatshme të shpalos një faqe të re në marrëdhëniet dypalëshe midis dy vendeve", thuhet ne thirje."Arsyetimi i retorikës së zjarrtë me brengosje për pozitën e pakicës kombëtare shqiptare në jug të Serbisë, paraqet manipulim të vrazhdë", vlerëson MPJS, duke pasur parasysh se mbrojtja e pakicës shqiptare dhe e të gjitha pakicave tjera në Serbi është në harmoni me standardet më të larta ndërkombëtare, shumë më tepër nga ato që zbatohen ndaj pakicave kombëtare që jetojnë në vetë Shqipërinë."Pikërisht, duke pasur parasysh mosekzistimin e çfarëdo kornize juridike për mbrojtjen e pakicës serbe dhe të tjera nacionalitete në Shqipëri, konsiderojmë se autoritetet shqiptare duhet të ndërmarrin masa serioze që të sigurohet mbrojtja e të gjitha komuniteteve në harmoni me standardet ndërkombëtare në fuqi", thuhet më tej në deklaratën serbe."Nga Shqipëria, si shtet i cili si prioritet të vetin e thekson pranimin e vlerave evropiane dhe anëtarësimin në BE, presim që vërtetë edhe të sillet në harmoni me prioritetet e proklamuara dhe me aksionet e veta të mos kontribuojë në destabilitetin e situatës në vendet fqinje", theksohet në fund të deklaratës së Ministrisë të Jashtme Serbe.
