Rama: Do t`i kthejmë dinjitetin figurës së policisë së shtetit
Nga OraNews Përditësimi i fundit 13 Janar 2013, 12:14
Kryetari i Partisë Socialiste Edi Rama ka përshëndetur policinë e shtetit me rastin e 100-vjetorit të krijimit të saj.Në një bashkëbisedim me gazetarët, kryesocialisti Rama theksoi se kur PS-ja të vijë në pushtet do t`i kthejë dinjitetin policisë së shtetit."Ne jemi të vendosur që mësuesit, policit dhe mjekut ti kthejmë dinjitetin e cënuar në këto vite keqqeverisje dhe keqtrajtimi të këtyre 3 figurave. Kur flas për keqqeverisje kam parasysh politizimin e tejskajshëm dhe rrënues të forcave të policisë dhe padyshim edhe mungesën e plotë të meritokracisë në gjithë procesin e promovimit të kontributeve dhe vlerave brenda policisë së shtetit” theksoi Rama.Kryesocialisti Rama gjithashtu bëri publike edhe disa të dhëna të një sondazhi të fundit bërë nga Partia Socialiste ku sipas tyre 72% e shqiptarëve thonë se gjendja e kriminalitetit dhe pasigurisë në vend eshtë shumë e keqe.“Një vlerësim shumë të sinqertë dhe të posaçëm për të gjithë ata që nën uniformën blu, sakrifikojnë në kushte jashtëzakonisht të vështira përmes pengesash, shpeshherë të pakapërcyeshme, që lidhen me korruptimin dramatik të drejtimit politik të Policisë së Shtetit, dhe që megjithatë i shërbejnë devotshmërisht shoqërisë" tha Rama.Rama theksoi gjithashtu se sipas të dhënave të dala nga sondazhi, 51.4 për qind qytetarë të këtij vendi e konsiderojnë situatën aktuale të papunësisë shumë të keqe, dhe 22% të keqe."Në total, 73.6% e shqiptarëve e vlerësojnë si plagën më të madhe të vendit, dhe situatën si shumë të keqe dhe të keqe. Korrupsioni, ka të njëjtin vlerësim. Sa i përket situatës së sigurisë dhe kriminalitetit në vend, në bazë të të dhënave të sondazhit, 72% e shqiptarëve thonë se gjendja e kriminalitetit dhe pasigurisë në vend eshtë shumë e keqe dhe e keqe" shtoi Rama.
Sipas kryetarit të PS-së, situata ekonomike në vend sa vjen dhe përkeqësohet ndërsa vlerësoi si rrugëdalje nga kjo gjëndje rindërtimin e modelit ekonomik."Ka një rrugë për të dalë nga kjo situatë e ardhur si rezultat i keqqeverisjes që e ka burimin tek një mandat i vjedhur dhe kjo është të rindërtohhet modeli ekonomik, fokusimi te investimet ndërtuese dhe investimet prodhuese që sjellin punësim. Ndërkohë ne jemi të vendosur që në 100 ditët e para të qeverisjes sonë të heqim taksën e biznesit të vogël dhe do të lehtësojmë frymëmarrjen për këto biznese dhe do të hapim një shteg që të tjerët të punësohen nëpërmjet biznesit të vogël. Gjithashtu është e nevojshme një politikë e re fiskale për të ulur kostot në bujqësi. Ne do pesëfishojmë financimin publik për bujqësinë si dhe do të fokusohmi te formimi profesional” tha Rama.
Koalicionet, Rama: Nuk i kam bërë ftesë LSI dhe FRDI pyetur në lidhje me koalicionet parazgjedhore, kryesocialisti Rama theksoi se nuk i ka bërë ftesë për koalicion as LSI-së dhe as FRD-së.“Nuk kam bërë ftesë, i jam përgjigjur një pyetje, se cili është koncepti im çfarë duhet të ndodhi në këto 6 muaj, si duhet të pozicionohen ato që i thonë vetes opozitë.LSI duhet të zgjedhë nëse do të jetë patericë e pushtetit, apo të kthehet në identitet” shtoi Rama.Ai garantoi se koalicioni do të jetë për dhe mbi programin për një Rilindje Shqiptare.Sa i përket akuzave të kohëve të fundit ndaj bashkëshortes së tij, Rama tha se “autorët e këtyre shpifjeve nuk meritojnë përgjigje vetëm përbuzje. Opinioni publik meriton një përgjigje dhe do ta ketë” shtoi Rama.
