PD: Dy kërkesa në Kushtetuese, për shkeljet e qeverisë
Nga OraNews Përditësimi i fundit 21 Janar 2014, 12:13
Partia Demokratike ka njoftuar sot se ka depozituar në Gjykatën Kushtetues dy kërkesa për ndalimin e e sulmit ndaj ILDK-së, dhe për rrëzimin e kërkesës së opozitës për komision hetimor mbi manipulimin e të dhënave tatimore.Deputeti demokrat Oerd Bylykbashi ndërsa sqaroi në një konferencë për shtyp këto dy nisma theksoi se Partia Demokratike është e palëkundur që të përdorë të gjitha instrumentet demokratike ndaj revanshit antikushtetues të kësaj mazhorance.Deklarata e plotëPartia Demokratike ka dorëzuar dje dy kërkesa në Gjykatën Kushtetuese kundër përshkallëzimit të veprimtarisë antikushtetuese dhe arrogante të qeverisë Rama-Meta.Së pari, Partia Demokratike ka kërkuar shpalljen si antikushtetuese të sulmit të hapur ndaj institucionit të pavarur të Inspektoratit të Lartë për Deklarimin dhe Kontrollin e Pasurive të qeveritarëve si dhe të përpjekjeve të paligjshme për shkarkimin e kreut të këtij institucioni.Me shkarkimin e kreut te ILDKP, Rama dhe Meta po kërkojnë me çdo kusht të marrin nën kontroll këtë institucion të pavarur në mënyrë që të fshehin pasuritë e paligjshme dhe aferat korruptive të tyre dhe bashkëpunëtorëve të tyre.Mazhoranca po shkel në mënyrë flagrante Kushtetutën dhe Rregulloren e parlamentit për t'ia arritur këtij qëllimi. Duke ditur se Kushtetuta dhe Vendimet e Gjykatës Kushtetuese nuk lënë hapsirë për këto sulme ndaj një institucioni të pavarur, kjo mazhorancë ka orkestruar një sulm me fletërrufe nga kolektivi i punonjësve dhe ka ngritur një grup kontrolli të paligjshëm që nuk e njeh as Kushtetuta dhe as Rregullorja e parlamentit.Gjithashtu, Partia Demokratike ka kërkuar të shpallë si antikushtetues vendimin e mazhorancës për të rrëzuar kërkesën e opozitës për ngritjen e një komisioni hetimor parlamentar në lidhje me ndërhyrjen e paligjshme të njerëzve të Kryeministrit në sistemin kompjuterik të Drejtorisë së Përgjithshme të Tatimeve dhe zhdukjen e miliona të dhënave dhe deklaratave të subjekteve tatimore.Me arrogancë, mazhoranca ia mohoi opozitës këtë të drejtë kushtetuese, të cilën Gjykata Kushtetuese e quan si një instrument të fuqishëm kontrolli të opozitës mbi qeverinë dhe mazhorancën. Kjo gjykatë ka përcaktuar qartë se kërkesa e opozitës për të hetuar nuk mund të rrëzohet e as të kufizohet.Këto dy raste tregojnë dy standarde të mazhorancës Rama-Meta. Ata kërkojnë që t'i mohojnë opozitës të drejtën për hetim parlamentar, kur vetë çirreshin se po u cënohej kjo e drejtë, edhe pse u është pranuar çdo kërkesë për hetim parlamentar sipas kushtetutës.Ata rrëzojnë kërkesën e opozitës me justifikimin se po heton prokuroria, ndërkohë kontrollin e paligjshëm mbi ILDKP e kryejnë paralel me nje hetim të prokurorisë.Partia Demokratike përsërit qëndrimin e saj të palëkundur dhe opozitën ballore me të gjitha instrumentet demokratike ndaj revanshit antikushtetues të kësaj mazhorance.
