Mandati i Xhaçkës shtyhet në vjeshtë, Këshilli i Mandateve në pritje të përgjigjeve të avokatit

Nga Fjorela Beleshi Përditësimi i fundit 28 Gusht 2022, 12:24

Demokratët nuk arritën ta çonin Olta Xhaçkën në Gjykatë Kushtetuese pa përfunduar sesioni parlamentar, por tentativa e radhës do të bëhet në shtator, me nisjen e punës së Kuvendit. PD kërkon heqjen e mandatit të deputetes socialiste me pretendimin se ka ndikuar me postin e saj në kabinetin qeveritar për t’i dhënë bashkëshortit shfrytëzimin e pronës publike, por opozita ka hasur në rezistencën e kolegëve të saj të mazhorancës.

“Ndoshta më mirë me shkrim brenda një jave”- thotë Lindita Nikolla.

Avokati i deputetes socilialiste, njëkohësisht edhe Ministres së Jashtme, Olta Xhaçka ka marrë më shumë se një javë kohë për t’u përgjigjur me shkrim pyetjeve dhe akuzave të opozitës.

Mandati i deputetes Xhaçka është shtyrë për në vjeshtë, pasi socialistët arritën të gjejnë mekanizmin për ta zgjatur punën e Këshillit për Rregulloren, Mandatet dhe Imunitetin duke përfshirë në proces edhe deputetët që mbështesin Sali Berishën.

Në ndihmë socialistes i kanë ardhur edhe pushimet zyrtare, pasi ky fakt është bërë pengesë për mbledhjen e Këshillit, duke e spostuar këtë çështje në shtator në sesionin e ri parlamentar dhe me një dimension të ri politik, në prag të një vit zgjedhor si dhe me një opozitë Berisha-Meta.

Kryediplomatja shqiptare rrezikon të përballet me Gjykatën Kushtetuese pasi PD e akuzon për shkelje të Kushtetutës dhe konfliktit të interesit me mandatin e deputetit për shkak të statusit të bashkëshortit të saj “Investitor strategjik” të dhënë nga qeveria e Edi Ramës në mars të këtij viti.

Opozita pretendon se me pushtetin e ministres Olta Xhaçka i ka dhënë bashkëshortit të saj akses në pronën publike, duke shfrytëzuar bregdetin në Himarë si dhe do të përfitojë nga paratë publike për të investuar 5.5 mln euro një hotel me 5 yje.

Në rast se PS nuk do ta lëshojë Ministren Xhaçka, atëherë PD me 28 firma ka edhe një mundësi për t’u drejtuar Kushtetueses.

Precedenti i cili mund të rrezikojë Xhaçkën është vendimi Gjykatës Kushtetuese në 2016, e cila i hoqi mandatin e deputetit Koço Kokëdhima me argumentin se kishte përfituar tendera publikë gjatë kohës që ishte në Kuvend.

Por e gjithë kjo përplasje politike për Olta Xhaçkën është vetëm një show politik pasi ajo e ka mbrojtur bashkëshortin e saj në Kuvend, madje e indinjuar që opozita po baltos ëndrrat e tij.

"Nuk mund të vish sot këtu dhe të hedhësh baltë mbi të, mbi punën e tij, mbi djersën e tij dhe mbi ëndrrat dhe aspiratat."- shprehet ministrja.

Shenim: *Ky është artikull ekskluziv i Ora News, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke cituar “Ora News” bashkëngjitur me linkun e artikullit origjinal.