Marrëveshja për dokumentat mes Kosovës dhe Serbisë, Rama: Uroj ta çojë dialogun në një nivel të ri
Nga OraNews Përditësimi i fundit 27 Gusht 2022, 19:44
Kryeministri Edi Rama ka përshëndetur marrëveshjen mes Kosovës dhe Serbisë për dokumentet.
Në një postim në rrjetet sociale, Rama shkruan:
"Lajm i bukur zgjidhja me dialog e çështjes së lëvizjes së lirë mes Serbisë e Kosovës, e bashkë me urimet për të dy palët uroj që ky zhvillim ta çojë dialogun në një nivel të ri, për të mos humbur kohë dhe energji pafund në arritjen e gjërave kaq thjeshtësisht logjike sa kjo sot".
Kosova dhe Serbia janë pajtuar që të heqin dorë nga lëshimi i dokumentit për hyrje-dalje për shtetasit e të dy vendeve.
Kështu bëri të ditur më 27 gusht shefi i diplomacisë së Bashkimit Evropian, Josep Borrell.
“Në kuadër të dialogut të ndërmjetësuar nga BE-ja, Serbia është pajtuar që të heqë dokumentet për hyrje-dalje për qytetarët me letërnjoftime të Kosovës dhe Kosova është pajtuar që të mos lëshojë dokumente të tilla për qytetarët që posedojnë karta të identitetit të Serbisë”, tha ai përmes një postimi në Twitter.
Sipas Borrell kjo ishte një zgjidhje evropiane.
“Ne përgëzojmë dy liderët për këtë vendim dhe për lidershipin e tyre”, tha ai.
