Gabriel Escobar: E trishtë ajo që po ndodh në Partinë Demokratike, shpresoj që…
Nga OraNews Përditësimi i fundit 14 Prill 2022, 13:55
Zyrtari i lartë amerikan për Ballkanin, Gabriel Escobar, ka shprehur keqardhje për ngjarjet në Partinë Demokratike. Gjatë një interviste për gazetën greke 'To Vima', diplomati amerikan ka thënë se një opozitë e fortë është themelore për funksionimin e demokracisë në vend duke shtuar se korrupsioni është një sfidë madhore që duhet të adresohet në të gjitha vendet e rajonit.
I dërguari amerikan për Ballkanin, Gabriel Escobar, ka shprehur keqardhje për zhvillimet në Partinë Demokratike.
Gjatë një interviste të gjatë për gazetën greke “To Vima”, zyrtari amerikan i cili vizitoi së fundi Greqinë, ka theksuar rëndësinë e një opozite të fortë si element i demokracisë.
“Ne kemi një marrëdhënie shumë të mirë me PD. Një demokraci e fortë ka nevojë për një opozitë të forte. Është e trishtueshme ajo që po ndodh me PD në këtë moment".
Zëvendës Ndihmës Sekretari që mbikëqyr politikën ndaj vendeve të Ballkanit Perëndimor dhe Zyrës së Shtypit dhe Diplomacisë Publike duke komentuar më tej zhvillimet në Shqipëri, është shprehur se populli duhet të shohë nga e ardhmja.
“Shpresoj, që anëtarët e PD-së dhe populli shqiptar të refuzojnë të kaluarën dhe të shikojnë nga e ardhmja. Shpresoj që ajo që ndodhi të mos rikthejë ditët e këqija, kur korrupsioni karakterizonte pikëpamjen e shumë njerëzve në rajon për Shqipërinë".
Sa i takon integrimit të rajonit, Escobar beson se të gjitha vendet e Ballkanit Perëndimor duhet të bëhen anëtarë të Bashkimit Evropian .
"Ata janë tashmë evropianë kulturalisht, historikisht dhe gjithnjë e më shumë ekonomikisht. Çdo vend që i bashkohet BE-së po bëhet më demokratik, më i qëndrueshëm dhe më i begatë ," tha ai, duke shtuar se politika e SHBA për këtë çështje mbeti e njëjtë.
"Kjo tregon se ideja evropiane është e gjallë në rajon."
Basti i madh ballkanik për BE-në dhe Perëndimin në përgjithësi është Bosnja dhe Hercegovina.
Kjo pasi shumë besojnë se vendi mund të jetë vatra e parë e madhe e destabilizimit në Ballkanin Perëndimor, duke pasur parasysh ekuilibrat dhe strukturat komplekse brenda tij.
Megjithatë Escobar ka përjashtuar çdo skenar problematik me argumentin se viti 1991 nuk mund të përsëritet pasi forcat paqeruajtëse në Evropë, dhe prania e NATO-s janë një garanci sigurie. Po kështu, sipas diplomatit amerikan, Kroacia dhe as Serbia nuk duan një luftë në kufijtë e tyre.
"Shumë njerëz e krahasojnë atë që po ndodh tani me atë që ndodhi në vitet 1990 dhe janë të shqetësuar për një luftë tjetër në Bosnje dhe Hercegovinë. Por në realitet nuk do të ketë luftë. Nuk është viti 1991. Ka forca paqeruajtëse në Evropë, NATO ka prani, ka një Përfaqësues të Lartë. As Kroacia dhe as Serbia nuk duan një luftë në kufijtë e tyre, kështu që nuk do të ketë luftë ."
Megjithatë, ai vë në dukje ekzistencën e problemeve serioze të korrupsionit.
“Problemi është korrupsioni i thellë i partive ekzistuese. Kjo është diçka që komuniteti euroatlantik duhet ta trajtojë menjëherë.
"Edhe nëse nuk ka luftë, ka një recesion demografik dhe ekonomik që mund të krijojë probleme për zhvillimin e vendit për brezat e ardhshëm."
Në lidhje me zgjedhjet e planifikuara për tetorin e ardhshëm, ai beson se ato do të zhvillohen dhe mbështet një "reformë të kufizuar zgjedhore dhe kushtetuese që do të krijojë një funksionalitet më të madh në federatë dhe në institucione."
"Një marrëveshje duhet të arrihet përmes negociatave midis palës boshnjake dhe kroate. Dhe ne shpresojmë se ata do ta bëjnë atë".
Për Escobar, rizgjedhja e Vuçiç në Serbi shënon "një aleancë më të ngushtë me Evropën", pasi ai thotë se Ballkani Perëndimor "nuk është i plotë pa Serbinë".
Megjithatë, ai beson se Beogradi "nuk mund të mbijetojë pa BE".
Lidhur me dialogun Beograd-Prishtinë, pasi thekson se Shtetet e Bashkuara e konsiderojnë Kosovën shtet sovran dhe të pavarur, “ sigurinë dhe integritetin territorial ” të së cilës e respektojnë, ai shpreh besimin se do të ketë përparim në bisedime.
Shqetësimi i madh amerikan për Ballkanin Perëndimor bazohet te ndikimi rus dhe kinez.
"Jam shumë i shqetësuar për ndikimet dashakeqe ruse dhe kineze. Unë nuk e përfshij Turqinë në këtë kategori. Turqia është një anëtare e NATO-s, ajo ndihmon në ruajtjen e paqes në Bosnje dhe Hercegovinë, gjithashtu ka punuar shumë për të sjellë investime në rajon ," tha ai.
Qëllimi i Rusisë në Ballkanin Perëndimor "është të destabilizojë qeveritë në mënyrë që t'i largojë më tej ato nga Evropa. Dhe këtë e bëri përmes dezinformatave, me ndikim negativ në partitë politike, madje edhe me grusht shteti. Ndikimi rus në Ballkan nuk sjell investime apo ndihmë. Kina ka qenë një partner ekonomik shumë i vështirë. Ndikimi i tij është absolutisht ekonomik. Ajo ka bllokuar disa vende në borxh negativ. Përgjigja për të dyja është integrimi më i ngushtë në BE dhe bashkëpunimi më i ngushtë BE-SHBA për të larguar ndikimin keqdashës rus."
